قازاقستاندىق جەڭىل اتلەت ايانا بولاتبەك قىزى دوپينگ سىناماسىنىڭ وڭ ناتيجەسىنەن كەيىن جاپونياداعى ازيا ويىندارىنا قاتىسۋدان ۋاقىتشا شەتتەتىلدى، دەپ حابارلايدى infohub.kz سايتى.
ءتيىستى مالىمدەمەنى حالىقارالىق تەستىلەۋ اگەنتتىگى (ITA) جاريالادى. قۇجاتتا كورسەتىلگەندەي، سپورتشىنىڭ سىناماسى دروستانولون مەتابوليتى — 3α-گيدروكسي-2α-مەتيل-5α-اندروستان-17-وننىڭ بولۋىنا قاتىستى قولايسىز اناليتيكالىق ناتيجە بەردى.
«حالىقارالىق دوپينگ-تەستىلەۋ اگەنتتىگى (ITA) ازيا وليمپيادالىق كەڭەسىنىڭ (OCA) اتىنان قازاقستاندىق جەڭىل اتلەت ايانا بولاتبەك قىزىنىڭ سىناماسى دروستانولون مەتابوليتى — 3α-گيدروكسي-2α-مەتيل-5α-اندروستان-17-وننىڭ بولۋىنا قاتىستى قولايسىز اناليتيكالىق ناتيجە بەرگەنىن حابارلايدى»، — دەلىنگەن ITA مالىمدەمەسىندە.
اگەنتتىك دروستانولون سپەسيفيكالىق ەمەس سۋبستانسيا رەتىندە جىكتەلەتىنىن جانە جارىس كەزىندە دە، جارىستان تىس تا كەز كەلگەن ۋاقىتتا تىيىم سالىنعانىن ءتۇسىندىردى.
«سپورتشى بۇل ءىس تۋرالى حاباردار ەتىلدى جانە ءىس دۇنيەجۇزىلىك دوپينگكە قارسى كودەكسكە جانە OCA-نىڭ دوپينگكە قارسى ەرەجەلەرىنە سايكەس شەشىلگەنگە دەيىن دەرەۋ كۇشىنە ەنەتىن جارىستارعا قاتىسۋدان ۋاقىتشا شەتتەتىلدى. بۇل سپورتشىعا ازيا ويىندارى كەزىندە ونەر كورسەتۋگە، جاتتىعۋعا، جاتتىقتىرۋشىلىق قىزمەتپەن اينالىسۋعا نەمەسە قانداي دا ءبىر قىزمەتكە قاتىسۋعا تىيىم سالىنعانىن بىلدىرەدى»، — دەپ حابارلادى ۇيىمدا.
سپورتشى ۋاقىتشا شەتتەتۋ ەنگىزۋگە سپورتتىق اربيتراج سوتىنىڭ — دوپينگكە قارسى بولىمىندە (CAS ADD) شاعىمدانۋعا قۇقىلى. سونداي-اق ول B سىناماسىن تالداۋدى تالاپ ەتۋگە قۇقىلى.