قازاقستاندا قيىن ومىرلىك جاعدايعا تاپ بولعان ايەل-كۋرەرلەرگە اتاۋلى الەۋمەتتىك قولداۋ كورسەتۋ بويىنشا پيلوتتىق جوبا ىسكە قوسىلادى. ولار زاڭگەرلىك جانە گۋمانيتارلىق كومەككە سەنە الادى، دەپ حابارلايدى infohub.kz سايتى.
ەڭبەك جانە حالىقتى الەۋمەتتىك قورعاۋ مينيسترلىگى، Yandex Qazaqstan كومپانياسى جانە «ىسكەر» قولداۋ ورتالىعى» قوعامدىق قورى باستامانى ىسكە قوسۋ تۋرالى مەموراندۋمعا قول قويدى. كومەك Yandex Go قوسىمشاسىنداعى «ەدا»، Lavka جانە «دوستاۆكا» سەرۆيستەرى ارقىلى تاپسىرىستاردى ورىندايتىن جانە قيىن نەمەسە داعدارىستىق جاعدايعا تاپ بولعان ايەلدەرگە ارنالعان.
جوباعا Yandex سەرۆيستەرى ارقىلى كەمىندە ءتورت اپتا قاتارىنان كۋرەر بولىپ جۇمىس ىستەيتىن جانە باعدارلاما تالاپتارىنا سايكەس كەلەتىندەر قاتىسا الادى. وتىنىمدەردى قاراۋ كەزىندە الەۋمەتتىك وسال ساناتتارعا باسىمدىق بەرىلەدى: جالعىزباستى انالار، كوپبالالى انالار، مۇگەدەكتىگى بار ايەلدەر، ەرەكشە قاجەتتىلىكتەرى بار بالالاردى تاربيەلەپ وتىرعان ايەلدەر، سونداي-اق اۋىر ناۋقاس وتباسى مۇشەلەرىنە كۇتىم جاسايتىندار. دەگەنمەن، بۇل ساناتتارعا جاتاتىندىق كومەكتى اۆتوماتتى تۇردە الۋعا كەپىلدىك بەرمەيدى — شەشىم ناقتى جاعداي مەن وتباسىنىڭ قاجەتتىلىكتەرىن ەسكەرە وتىرىپ، جەكە قابىلدانادى.
جوبا اياسىندا ايەلدەرگە الەۋمەتتىك قىزمەتتەر مەن مەملەكەتتىك قولداۋ شارالارىن الۋعا كومەكتەسەدى. سونداي-اق زاڭگەرلىك جانە پسيحولوگيالىق كومەك، گۋمانيتارلىق كومەك، قۇقىقتىق جانە قارجىلىق ساۋاتتىلىقتى ارتتىرۋ، ءبىلىم بەرۋ جانە اقپاراتتىق باعدارلامالارعا قول جەتكىزۋ، نەگىزدەر بولعان كەزدە مەديسينالىق كومەك الۋعا جاردەمدەسۋ قاراستىرىلعان. كومەكتىڭ ءتۇرى مەن كولەمى جەكە انىقتالادى.
قاتىسۋ شارتتارى مەن ءوتىنىم بەرۋ ءتارتىبى تۋرالى اقپارات «ياندەكس پرو» قوسىمشاسىنداعى «نەگىزگى ىنتىماقتاستىق تۋرالى» بولىمىندە، «ايەل-كۋرەرلەرگە كومەك» ماقالاسىندا قولجەتىمدى. سونداي-اق ءتيىستى سەرۆيستىڭ قولداۋ قىزمەتىنە حابارلاسۋعا بولادى.
جوبانى ىسكە قوسۋ تۋرالى قۇجاتقا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ، Yandex Qazaqstan كومپانيالار توبىنىڭ جەتەكشىسى تيمۋر شالەكەنوۆ جانە «ىسكەر» قولداۋ ورتالىعى» قورىنىڭ ديرەكتورى تولقىن سامەتوۆا قول قويدى. جوبا پيلوتتىق رەجيمدە ىسكە قوسىلدى، ونىڭ قورىتىندىسى بويىنشا تاراپتار مۇنداي قولداۋدىڭ سۇرانىسقا يەلىگىن جانە باعدارلامانى ودان ءارى دامىتۋ مۇمكىندىگىن باعالايدى.
بۇعان دەيىن قازاقستاندا تاكسي جۇرگىزۋشىلەرى مەن كۋرەرلەرگە كليەنتتەرمەن كاسىبي قارىم-قاتىناس جاساۋ بويىنشا تەگىن ونلاين-كۋرس ىسكە قوسىلعانى حابارلانعان بولاتىن.