ايەلدەر تەننيس قاۋىمداستىعى (ءاتق) ايەلدەر جارىسىنا قاتىسۋشى تەننيسشىلەردىڭ ءبىر رەتتىك گەنەتيكالىق تەستتەن ءوتۋىن مىندەتتەدى، دەپ حابارلايدى infohub.kz سايتى.
ءاتق-نىڭ جەكسەنبى كۇنى جاريالاعان جاڭا ەرەجەسىنە سايكەس، جىنىستى انىقتايتىن گەنگە تەستىلەۋ جاق ىشىنەن جاعىندى نەمەسە قان ءاناليزى ارقىلى جۇرگىزىلەدى. بۇل ەرەجە سەيسەنبىدەن باستاپ كۇشىنە ەنەدى. بۇعان دەيىن قولدانىلعان قاعيدات بويىنشا، ترانسگەندەر ايەلدەر ەگەر ولار وزدەرىن ايەل رەتىندە تانىستىرىپ، ەكى جىل بويى تەستوستەرون دەڭگەيىن تومەندەتىپ ۇستاسا، جارىسقا قاتىسا الاتىن.
ءقازىر كاسىبي تەننيستە ەشبىر دەڭگەيدە بەلسەندى ترانسگەندەر ايەلدەر جوق.
«SRY گەنىنە ءبىر رەتتىك تەستىلەۋ ءاتق تۋرنيرلەرىنە قاتىسۋ قۇقىعىن راستايدى»، — دەدى ءاتق وكىلى Reuters اگەنتتىگىنە. «ويىنشىلاردى تەستىلەۋ 2026 جىلى باستالادى، بۇل رەتتە قۇپيالىلىق پەن دەرەكتەر قاۋىپسىزدىگىنىڭ بارلىق شارالارى ساقتالادى. ءاتق بۇل سەزىمتال ءارى كۇردەلى ماسەلە ەكەنىن تۇسىنەدى جانە بارلىق ويىنشىلارعا ءادىل قاراپ، ساياساتتى قۇرمەتپەن ءارى ويلاستىرا جۇزەگە اسىرۋعا مىندەتتەنەدى».
ترانسگەندەر ويىنشى ريني ريچاردس 1977–1981 جىلدار ارالىعىندا ايەلدەر كاسىبي تۋرنەدە ونەر كورسەتكەن. كەيىن ول تەننيس اڭىزى، گوموسەكسۋالدار قۇقىعىن قورعاۋشى مارتينا ناۆراتيلوۆانىڭ جاتتىقتىرۋشىسى بولدى. 18 رەت «ۇلكەن دۋلىعا» ءتۋرنيرىنىڭ جەڭىمپازى اتانعان ناۆراتيلوۆا سپورتتاعى ترانسگەندەرلەردىڭ قاتىسۋىن سىناپ كەلەدى. ال الەمنىڭ ءبىرىنشى راكەتكاسى ارينا سابالەنكا ايەلدەردىڭ ترانسگەندەرلەرمەن كەزدەسۋىن ادىلەتسىز دەپ سانايدى.
12 رەت «ۇلكەن دۋلىعا» جەڭىمپازى، 1973 جىلى اتاقتى «جىنىستار ايقاسىندا» جەڭىسكە جەتكەن بيللي دجين كينگ ترانسگەندەرلەردى شەتتەتۋ كەمسىتۋشىلىك دەپ ەسەپتەيدى.
سوڭعى جىلدارى الەمدىك جەڭىل اتلەتيكا جانە الەمدىك بوكس سياقتى ءبىرقاتار سپورت فەدەراسيالارى وسىنداي گەنەتيكالىق تەستىلەردى ەنگىزگەن.
ناۋرىز ايىندا حالىقارالىق وليمپيادا كوميتەتى ايەلدەر ساناتىنداعى جارىستارعا تەك ءبىر رەتتىك تەستىلەۋدەن وتكەن بيولوگيالىق ايەل سپورتشىلار عانا قاتىسا الاتىنىن مالىمدەدى.
ترانسگەندەرلەردى قورعاۋ توپتارى ترانسگەندەر سپورتشىلاردى شەتتەتۋ كەمسىتۋشىلىك دەپ سانايدى. ال ترانسگەندەرلەردىڭ قاتىسۋىنا قارسىلار ەركەكتەردىڭ جىنىستىق جەتىلۋى سپورتشىلارعا بۇلشىقەت جانە قاڭقا ارتىقشىلىعىن بەرەتىنىن، اۋىسۋ كەزىندە بۇل ارتىقشىلىقتىڭ جويىلمايتىنىن ايتادى.