ەكى جىلدى زارمەنەن
وتكىزدى جۋرنال «ايقابىڭ».
الاشتى تەگىس ارالاپ،
«ايقابىم» جايىن بايقادىڭ.
وڭىنا جۇرتتىڭ ءسۇيىنىپ،
تەرىسكە باستى شايقادىڭ.
الابىڭا جيىلدى
بىلگىشى ءھار ءبىر تايپانىڭ.
مۇڭ-مۇقتاجدى كۇزەتتىڭ
كورسەتىپ ورنەك بايتاعىن.
وقۋشىڭ وتىر قۇمار بوپ،
تاعى دا بار ما ايتارىڭ؟
«ايلىق ءجۇرىس الىس» دەپ،
ايىندا ەكى شىققانىڭ.
«شابىندىق ەرگە، نامىس» دەپ،
ءوز بورىشىڭدى ۇققانىڭ.
جۇرەك قانىن، كوز جاسىن
قايناتتىڭ قوزعاپ جۇرت قامىن.
ءتۇزۋ جولعا سالام دەپ،
اداسىپ تەرىس ىققانىن.
اقيقاتتى تۋرا ايتىپ،
جاسقانىپ، جاسىپ بۇقپادىڭ.
از پۇلمەنەن كوپ قايرات
كورسەتتىڭ ورلىك، سىرتتانىم!
قازاقتان شىققان جۇيرىكتەر
كورسەتتى كوزگە شابىسىن.
قالامى وتكىر ءبىلىمپاز
ءىىىاشتى الىسقا دابىسىن.
«الاش!» دەپ ۇران شاقىردى،
جۇرتىنىڭ جوقتاپ نامىسىن.
جارقىراپ جانعان جۇلدىزداي
ۇقتىرىپ ايقىن ءھار ءىسىن.
كوڭىلى جابىق، كوزى كور
ءبىلسىن قايدان ءمانىسىن؟
جولباسشى بولعان زاتتارعا
ابىروي، باقىت دارىسىن.
جومارتتىقتا ءبىرىنشى
ورىن العان ەل ەدىك.
ءۇش تەڭگەدەن ولمەسپىز،
كەل، مىرزالار، بەرەلىك.
بىلگىشتەردىڭ سوڭىنان
شۇبىرىپ ءبىز دە ەرەلىك.
گازەتتىڭ ءسوزى ەرتەگى -
ەرىگىپ جازعان دەمەلىك.
تولىقسىپ كەشە تۇرعاندا -
ءبىز كىمدەردەن كەم ەدىك؟
كەمىتكەن جاۋىز ناداندىق،
ناداندىقتان بەزەلىك.
گازەت-جۋرنال وقىساڭ،
كوزىڭدى، قازاق، اشاسىڭ.
دۇنيە ءحالىن بىلمەسەڭ،
ىلگەرى قالاي باساسىڭ؟
يگىلىك جولدان تارتىنبا،
بەكەرگە دە شاشاسىڭ.
ونەر-بىلىم تىستەي مە،
شەگىنىپ نەگە قاشاسىڭ؟
سارعايىپ جاتقان ءبىر ءعارىپ
جىبەردى جازىپ باتاسىن.
حالىققا شاشىپ جەمىسىن
جاساسىن «ايقاپ»، جاساسىن!

---