شىعىس قازاقستان وبلىسىنداعى تاس جولدا جۇرگىزۋشىلەر جولدىڭ ءدال ورتاسىنان شىققان ايۋعا تاپ بولدى. كۋاگەرلەردىڭ ايتۋىنشا، جانۋار السىرەگەن كورىنەدى، دەپ حابارلايدى infohub.kz.
وقيعا شقو-نىڭ مارقاكول اۋدانىنداعى اقجايلاۋ مەن ۇرىنحايكا اۋىلدارى اراسىنداعى جولدا بولدى. جەرگىلىكتى تۇرعىندار جابايى اڭدى بەينەگە ءتۇسىرىپ العان. وقيعا ورنىنا پوليسيا جانە ورمان شارۋاشىلىعى قىزمەتكەرلەرى جەدەل جەتتى.
كۋاگەرلەردىڭ سوزىنە قاراعاندا، ايۋ جەڭىل كولىكتەر مەن موتوسيكلدەرگە ەشقانداي اگرەسسيا تانىتپاعان. جانۋاردىڭ السىرەگەنى سونشالىق، كومەككە مۇقتاج بولۋى مۇمكىن.
مارقاكول اۋدانىنىڭ اكىمدىگى وقيعا ورنىنا مارقاكول ورمان شارۋاشىلىعى مەن پوليسيا ءبولىمىنىڭ قىزمەتكەرلەرى شىققانىن حابارلادى. الدىن الا مالىمەتتەرگە سايكەس، ايۋ تاۋلى ايماققا قاراي بەتتەگەن.
ورمان شارۋاشىلىعى زارداپ شەككەندەر جوق ەكەنىن، تۇرعىنداردىڭ ءومىرى مەن دەنساۋلىعىنا ءقاۋىپ ءتونىپ تۇرعان جوق دەپ مالىمدەدى. قۇزىرلى ورگاندار جاعدايدى باقىلاۋدا ۇستاپ وتىر.
وبلىس بيلىگى جەرگىلىكتى تۇرعىنداردى ساقتىق شارالارىن ساقتاۋعا شاقىرادى: جابايى جانۋارعا جاقىنداماۋ، ونى تاماقتاندىرۋعا نەمەسە قۋدالاۋعا ارەكەتتەنبەۋ، سونداي-اق تاڭەرتەڭ جانە كەشكە ورمان ماسسيۆىندە سەرۋەندەۋدەن ۋاقىتشا باس تارتۋ.