ءازىربايجان رەسپۋبليكاسى كاسپي تەڭىزىندەگى وقۋ-جاتتىعۋ كەزىندە توعىز قازاقستاندىق اسكەري قىزمەتشىنىڭ قازا تابۋىنا بايلانىستى قازاقستانعا رەسمي كوڭىل ايتتى، دەپ حابارلايدى infohub.kz سايتى.
كوڭىل ايتۋ جەدەلحاتىن ءازىربايجاننىڭ سىرتقى ىستەر مينيسترلىگى مەن قورعانىس مينيسترلىگى جولدادى. ديپلوماتيالىق ۆەدومستۆو بولعان قايعىلى وقيعاعا قاتتى كۇيزەلگەنىن ءبىلدىرىپ، قازا تاپقانداردىڭ وتباسىلارىنا، سونداي-اق قازاقستان حالقى مەن ۇكىمەتىنە كوڭىل ايتتى.
«قۇداي قازا تاپقانداردىڭ جانىن ءجانناتتا ەتسىن، وتباسىلارىنا وسى اۋىر كەزەڭدە كۇش پەن سابىر بەرسىن. ءالى دە حابار-وشارسىز كەتكەندەردىڭ امان-ەسەن تابىلۋىنا ۇمىتتەنەمىز، ال جاراقات العان اسكەري قىزمەتشىگە تەزىرەك ساۋىعىپ كەتۋىن تىلەيمىز»، — دەلىنگەن ءازىربايجان ءسىم حابارلاماسىندا.
قازاقستاننىڭ قورعانىس ءمينيسترى داۋرەن قوسانوۆقا بولەك كوڭىل ايتۋ جەدەلحاتىن ءازىربايجاندىق ارىپتەسى — گەنەرال-پولكوۆنيك زاكير گاسانوۆ جولدادى.
«كاسپي تەڭىزىندەگى وقۋ-جاتتىعۋ كەزىندە سۋعا كەتكەن توعىز اسكەري قىزمەتشىنىڭ قازا تابۋى، ءبىر اسكەري قىزمەتشىنىڭ جاراقات الۋى جانە جەتى ادامنىڭ حابار-وشارسىز كەتۋى تۋرالى حاباردى ەستىپ قاتتى كۇيزەلدىم. وسى قايعىلى وقيعا سالدارىنان قازا تاپقانداردىڭ تۋعان-تۋىستارىنا شىن جۇرەكتەن كوڭىل ايتامىن، جاراقات العان اسكەري قىزمەتشىگە تەزىرەك ساۋىعىپ كەتۋىن تىلەيمىن. ىزدەستىرۋ-قۇتقارۋ وپەراسيالارىنىڭ وڭ ناتيجەمەن اياقتالۋىنا ۇمىتتەنەمىن. قۇداي قازا تاپقانداردىڭ جانىن ءجانناتتا ەتسىن. اللاھ راحمەت ەتسىن!» — دەپ كەلتىرەدى كوڭىل ايتۋ ءماتىنىن Day.Az.
ەسكە سالايىق، توتەنشە وقيعا 24 قىركۇيەكتە ماڭعىستاۋ وبلىسىنداعى كاسپي تەڭىزى جاعالاۋىندا وقۋ-جاۋىنگەرلىك تاپسىرمالاردى ورىنداۋ كەزىندە بولدى: تەڭىزگە 19 اسكەري قىزمەتشىنى اعىزىپ اكەتتى. قازاقستان قورعانىس مينيسترلىگىنىڭ دەرەگىنشە، توعىز ادام قازا تاپتى، ۇشەۋىن قۇتقارىپ قالۋ مۇمكىن بولدى، ولاردىڭ بىرەۋى اۋرۋحاناعا جات قىزىلدى. قالعان جەتى اسكەري قىزمەتشىنى ىزدەۋ جالعاسۋدا.
اسكەريلەردىڭ قازا تابۋىنا قاتىستى قىلمىستىق ءىس قوزعالدى. باس پروكۋراتۋرا بولعان وقيعانىڭ ءمان-جايىن انىقتايتىن جەدەل-تەرگەۋ توبىن قۇردى.