قازاقستان قۇراماسى ازيادا-2026 ويىندارىنىڭ كەزەكتى جارىس كۇنىن ەكى ەمەس، ءبىر التىن مەدالمەن اياقتادى. سەبەبى مارافوندىق قاشىقتىقتاعى سپورتتىق جۇرىستەن جەڭىسكە جەتكەن وتاندىق جەڭىل اتلەت ياسمينا توقسانباەۆانىڭ ناتيجەسىنە نارازىلىق تۇسكەن، دەپ حابارلايدى infohub.kz سايتى.
توقسانباەۆا مارەگە ءبىرىنشى بولىپ جەتكەن. الايدا ازيادانىڭ رەسمي جۇيەسىندە قورىتىندى حاتتاما ءالى كۇنگە دەيىن جاريالانعان جوق. ونىڭ ورنىنا جارىس بەتىندە «Protested» دەگەن جازۋ تۇر.
«سپورت شرەدينگەرا» پورتالى قازاقستان ۇلتتىق وليمپيادالىق كوميتەتىنىڭ جاعدايدى تۇسىندىرگەن حابارلاماسىن جاريالادى.
«قازاقستاندىق سپورتشىعا ونىڭ كيگەن كروسسوۆكاسىنا قاتىستى نارازىلىق ءتۇستى. قازىرگى تاڭدا حالىقارالىق جەڭىل اتلەتيكا فەدەراسياسى World Athletics وسى نارازىلىقتى قاراستىرىپ، بۇل كروسسوۆكا ۇلگىسىنىڭ رۇقسات ەتىلگەن اياق كيىم تىزىمىنە كىرەتىن-كىرمەيتىنىن تەكسەرۋدە. بارلىق رەسمي اقپارات كەلىپ تۇسكەن سايىن جاريالاناتىن بولادى»، — دەدى ۇوك-تە.
توقسانباەۆانىڭ ءوزى Instagram-stories-تە «قولداۋ كورسەتىپ، قاسىندا بولعان بارلىق ادامدارعا» العىس ايتتى.
«راقمەت، قازاقستان! ءقازىر ماعان سىزدەردىڭ قولداۋلارىڭىز اسا قاجەت. بۇگىن ءبىز ازيانىڭ جاڭا رەكوردىن ورناتتىق، بۇگىن ءبىز تاريحتى قايتا جازدىق! ەگەر بۇل جەتىستىگىمنەن ايىرىلسام دا، قايتا ورالىپ، مۇنى تاعى دا جاسايمىن!» — دەپ جازدى جەڭىل اتلەت.
ازيادا-2026 جالپى ەسەبىندە جەكسەنبى قورىتىندىسى بويىنشا قازاقستان قۇراماسىنىڭ توعىز التىن مەدالى بار. مۇندا شپاگادان كوماندالىق تۋرنيردە كيريلل پروحودوۆ، ۆاديم شارلايموۆ، رۋسلان قۇربانوۆ جانە ەرلىك سەرتايدىڭ جەڭىسى عانا ەسەپكە الىندى.
قازاقستان قۇراماسىنا كۇمىس مەدال اكەلگەندەر — نورا دجەرۋتو (3000 مەترگە كەدەرگىلەردەن جۇگىرۋ) جانە اۋىر اتلەت ايانات جۇماعالي (77 كەلىگە دەيىن). قولانى باتۋتشى ەرلان تاسماعامبەتوۆ، سونداي-اق سينحروندى جۇزۋشىلەر نارگيزا بولاتوۆا مەن ياسمين تۋياكوۆا جەڭىپ الدى.
جالپى ەسەپتە قازاقستان قۇراماسى بەسىنشى ورىندا قالدى. وزبەكستاننان قالىس قالۋ — ءبىر التىن مەدال. تايلاند قۇراماسىنان قازاقستاندىقتار كۇمىس مەدالدارىنىڭ كوپتىگىنىڭ ارقاسىندا وزىپ تۇر.