جاپونيادا ءوتىپ جاتقان ازيا ويىندارىندا وزبەكستاننىڭ ەكى سپورتشىسى دوپينگ-باقىلاۋدان وتە الماي، تۋرنيردەن شەتتەتىلدى. بۇل تۋرالى infohub.kz سايتى حابارلايدى.
Sports.kz دەرەگىنشە، وزبەكستاندىق ارالاس جەكپە-جەك (مما) شەبەرى نوديربەك شاۆكاتوۆتىڭ انتيدوپينگ ەرەجەلەرىن بۇزعانى تۋرالى العاشقى اقپاراتتى حالىقارالىق تەستىلەۋ اگەنتتىگى (ITA) مالىمدەدى. 22 قىركۇيەكتە جاپونيادا جارىستان تىس دوپينگ-باقىلاۋ بارىسىندا الىنعان سىنامادان مەلدوني تابىلدى.
شاۆكاتوۆ ءىس شەشىلگەنشە ۋاقىتشا شەتتەتىلدى. شەتتەتۋ مەرزىمىندە سپورتشىعا ازيا ويىندارى-2026 اياسىندا جارىستارعا قاتىسۋعا، جاتتىعۋعا، جاتتىقتىرۋشىلىق قىزمەتپەن اينالىسۋعا جانە كەز كەلگەن باسقا دا قىزمەتكە تىيىم سالىنعان.
سپورتشى ۋاقىتشا شەتتەتۋدى سپورتتىق اربيتراج سوتىنىڭ انتيدوپينگ بولىمىنە (CAS ADD) شاعىمدانۋعا، سونداي-اق B سىناماسىن تالداۋدى سۇراۋعا قۇقىلى. ول بۇعان دەيىن جارىستىڭ قولا جۇلدەگەرى اتانعانى اتاپ ءوتىلدى.
Sportarena.kz دەرەگىنشە، وزبەكستاننىڭ تاعى ءبىر سپورتشىسى دوپينگ-باقىلاۋدان وتە المادى: كانوەمەن ەسۋشى پاۆەل ەيگەلدىڭ سىناماسى تريمەتازيدينگە قاتىستى قولايسىز اناليتيكالىق ناتيجە بەردى.
بۇل زات جارىس كەزىندە دە، جارىستان تىس كەزەڭدە دە تىيىم سالىنعانى جانە سپەسيفيكالىق ەمەس تىيىم سالىنعان سۋبستانسيالارعا جاتاتىنى اتاپ ءوتىلدى. سىنامانى ITA ماماندارى 2026 جىلعى 23 قىركۇيەكتە جاپونيادا جارىستان تىس دوپينگ-باقىلاۋ اياسىندا الدى.
سپورتشى انىقتالعان بۇزۋشىلىق تۋرالى حاباردار ەتىلىپ، تەرگەۋ اياقتالعانشا ۋاقىتشا شەتتەتىلدى. ول دا شەتتەتۋگە شاعىمدانا الادى.