قازاقستان رەسپۋبليكاسىنىڭ باسەكەلەستىكتى قورعاۋ جانە دامىتۋ اگەنتتىگى مونوپولياعا قارسى زاڭنامانى اۋقىمدى رەفورمالاۋعا كىرىستى. بۇل وزگەرىستەر بيزنەس ءۇشىن ويىن ەرەجەسىن تۇبەگەيلى جاڭارتپاق. ۆەدومستۆو «جۇمساق قۇقىق» تاجىريبەسىنەن باس تارتىپ، تەرگەۋ مەرزىمىن ءۇش ايدان توعىز ايعا دەيىن ۇزارتادى، قاجەت بولسا تاعى ءۇش ايعا سوزۋعا مۇمكىندىك بەرمەك. سونىمەن قاتار بۇزۋشىلاردىڭ جىلدىق تابىسىنىڭ 0،5 پايىزى مولشەرىندە اينالىم ايىپپ ۇلى ەنگىزىلىپ، باعا كەلىسىمىنە بارعانىن مويىنداعاندارعا يممۋنيتەت بەرىلەدى، دەپ حابارلايدى infohub.kz سايتى.
بۇل تۋرالى ازرك ءتوراعاسى مارات وماروۆ الماتىدا وتكەن XVI قازاقستاندىق زاڭ فورۋمىندا مالىمدەدى.
وزگەرىستەرگە ەىدۇ ساراپتامالىق شولۋىنىڭ ۇسىنىمدارى تۇرتكى بولدى. حالىقارالىق ساراپشىلار الدىن الۋ شارالارىنا – حابارلاما مەن ەسكەرتۋگە – شامادان تىس سۇيەنۋ جازانىڭ تەجەۋشى كۇشىن ايتارلىقتاي السىرەتتى دەگەن قورىتىندىعا كەلدى. سونىڭ سالدارىنان كومپانيالار العاشقى بۇزۋشىلىق قاتاڭ سانكسياعا اكەلمەيدى، ءىستى ءوز ەركىمەن، جەڭىل جابۋدى ادەتكە اينالدىرعان.
بۇل تەڭگەرىمسىزدىكتى تۇزەتۋ ءۇشىن ازرك جۇمساق ەسكەرتۋ جاسالاتىن بۇزۋشىلىقتار ءتىزىمىن قىسقارتىپ، ولاردى جوعارى شوعىرلانعان نارىقتاردا مۇلدەم قولدانبايتىن بولادى. سونداي-اق قايتالاپ بۇزۋ مەرزىمى ءبىر جىلدان ەكى جىلعا ۇزارتىلادى.
«تاعى ءبىر وزگەرىس جاۋاپكەرشىلىكتەن بوساتۋ باعدارلاماسىنا – Leniency قاتىستى. اگەنتتىكتە ءوتىنىش بەرىلگەنگە دەيىن كارتەل تۋرالى اقپارات بولماۋى جانە بارلىق زالالدى الدىن الا وتەۋ تالابىن الىپ تاستاۋ ۇسىنىلىپ وتىر. كارتەلدى ءوز ەركىمەن اشىپ، بۇزۋشىلىقتى مويىنداعان ءبىرىنشى قاتىسۋشى جاۋاپكەرشىلىكتەن تولىق يممۋنيتەت الا الادى»، – دەيدى ازرك-دا.
بۇدان بولەك، رەفورما مونوپوليستەردەن زارداپ شەككەندەرگە كەلتىرىلگەن زياندى وتەۋ ءۇشىن ۇجىمدىق تالاپ-ارىز ينستيتۋتىن ەنگىزەدى. بۇل سحەمادان قارجى سەكتورى مەن باعالى قاعازدار نارىعى عانا شىعارىلادى.
بيزنەستى الدىن الا قورعاۋ ءۇشىن مونوپولياعا قارسى اۋديت پايدا بولادى. ول سىرتقى ساراپشىلاردى تارتىپ، ايىپپۇل تولەۋ ءقاۋپىنسىز بۇزۋشىلىقتاردى ءوز بەتىنشە انىقتاپ، جويۋعا مۇمكىندىك بەرەدى.
ازرك سيفرلىق پلاتفورمالار مەن ماركەتپلەيستەرگە ەرەكشە كوڭىل بولەدى. ولار ءۇشىن پايدالانۋشىلار، ساتۋشىلار سانى مەن تابىسىن ەسكەرەتىن ارنايى رەتتەۋ ەنگىزىلىپ، ديناميكالىق باعا بەلگىلەۋگە شەكتەۋ قويىلادى.
ءوز كەزەگىندە ۆەدومستۆونىڭ ءوزى دە سيفرلىق رەلسكە كوشتى: ىسكە قوسىلعان Antitrust جۇيەسى مەن ءۇش جاساندى ينتەللەكت شەشىمى مونوپولياعا قارسى ماماندارعا تاريفتەردى تالداۋعا، مەملەكەتتىك ساتىپ الۋداعى كەلىسىمدەردى اشكەرەلەۋگە جانە نورماتيۆتىك اكتىلەردى تەكسەرۋگە كومەكتەسەدى.
بۇعان دەيىن «كۋرسيۆ» «قازگيدرومەتتى» ءوزىن-وزى قارجىلاندىرۋعا مىندەتتەۋ جوسپارلانىپ وتىرعانىن جازعان بولاتىن. ءقازىر كومپانيا كورسەتەتىن قىزمەتتەردىڭ باسىم بولىگى مەملەكەتتىك مونوپوليا سانالادى.