2026 جىلعى 1 قىركۇيەكتەن باستاپ قازاقستاندا بيولوگيالىق بەلسەندى قوسپالاردى (باد) مىندەتتى سيفرلىق ماركىلەۋ ەنگىزىلەدى. وسى كۇننەن باستاپ وندىرىلگەن نەمەسە اكەلىنگەن بارلىق ءونىم Data Matrix كودىمەن تاڭبالانۋى ءتيىس، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىندە تۇسىندىرگەندەي، باد-تىڭ مىندەتتى قاداعالانۋىن ىسكە قوسۋ 2027 جىلعى 1 ناۋرىزعا جوسپارلانعان. وسى ۋاقىتتان باستاپ ءونىم اينالىمى تولىق ەلەكتروندىق قۇجات اينالىمىمەن جانە نارىق قاتىسۋشىلارى اراسىندا تاۋاردى بەرۋ كەزىندە ءاربىر وپەراسيانى راستاۋمەن قاتار جۇرەدى. سيفرلىق ماركىلەۋ اياسىندا ءاربىر ءونىم بىرلىگىنە بىرەگەي Data Matrix كودى بەرىلەدى، ول قاپتاماعا جازىلادى جانە تاۋارلاردى ماركىلەۋ مەن قاداعالاۋدىڭ ءبىرىڭعاي وپەراتورى جۇيەسىندە تىركەلەدى. بۇل تاۋاردىڭ وندىرۋشىدەن نەمەسە يمپورتتاۋشىدان دۇكەن سورەسىنە دەيىنگى بارلىق كەزەڭدەردەگى جولىن باقىلاۋعا مۇمكىندىك بەرەدى.
مەملەكەت بۇل شارا نارىقتاعى باد اينالىمىنىڭ اشىقتىعى مەن زاڭدىلىعىن قامتاماسىز ەتۋگە، ادال بيزنەستى جوسىقسىز باسەكەلەستىكتەن قورعاۋعا جانە بۇزۋشىلىقتاردى ۋاقىتىلى انىقتاۋعا كومەكتەسەدى دەپ ەسەپتەيدى. ماركىلەۋ نارىقتىڭ جەتكىلىكتى بولىگىن قامتىعان كەزدە، ساتىپ الۋشىلار Naqty Onim قوسىمشاسىنداعى قاپتاماداعى Data Matrix كودىن سكانەرلەۋ ارقىلى ساتىپ الىناتىن باد-تىڭ زاڭدىلىعىن ءوز بەتىنشە تەكسەرە الادى، دەپ ەسكە سالدى دەنساۋلىق ساقتاۋ مينيسترلىگىندە.
باد اينالىمى سالاسىندا جۇمىس ىستەيتىن كومپانيالارعا tanba.markirovka.kz پورتالىنداعى تاۋارلاردى ماركىلەۋ مەن قاداعالاۋدىڭ سيفرلىق جۇيەسىندە (سس مپت) تىركەلۋ، سونداي-اق جۇيەدە تاۋار كارتوچكالارىن الدىن الا تىركەۋدى باستاۋ قاجەت. تىركەلگەن تاۋار كارتوچكالارى بەلگىلى ءبىر ۋاقىتتى قاجەت ەتەتىن مودەراسيا پروسەدۋراسىنان وتەدى. وسىعان بايلانىستى نارىق قاتىسۋشىلارىنا تىركەلۋدى كەيىنگە قالدىرۋعا كەڭەس بەرىلمەيدى — بۇل تالاپ كۇشىنە ەنگەنگە دەيىن مودەراسيانى اياقتاۋعا جانە ماركىلەۋ كودتارىن ۋاقىتىلى تاپسىرىس بەرۋگە مۇمكىندىك بەرەدى.
مىندەتتى ماركىلەۋ ەنگىزىلگەنگە دەيىن وندىرىلگەن ماركىلەنبەگەن باد قالدىقتارىن اينالىم قاتىسۋشىلارى بەلگىلەنگەن تىزبەگە سايكەس جارامدىلىق مەرزىمى وتكەنشە ساتا الادى، دەپ مالىمدەدى دەنساۋلىق ساقتاۋ مينيسترلىگىندە.