ەلوردادا بىرىككەن اراب امىرلىكتەرىنىڭ ينۆەستورلارىنىڭ قاتىسۋىمەن سالىنعان SABIS International School حالىقارالىق مەكتەبى جۇمىسىن باستادى. جوبا قۇنى 30 ميلليون اقش دوللارىن قۇرادى، دەپ حابارلايدى infohub.kz سايتى.
SABIS International School – Astana وقۋ ورنى قازاقستان پرەزيدەنتىنىڭ باا-گە ساپارى قورىتىندىسى بويىنشا بەرگەن تاپسىرماسىنا سايكەس سالىندى. جوبانى ەميراتتىق Emirates Global Education Investment Group، Mazrui International جانە SABIS Holding كومپانيالارى ءبىلىم باسقارماسى مەن KAZAKH INVEST ۇلتتىق كومپانياسىنىڭ قولداۋىمەن جۇزەگە اسىردى.
قۇرىلىسقا 30 ميلليون دوللار سالىندى، ال جالپى ينۆەستيسيا كولەمى 45 ميلليونعا جەتۋى ءتيىس. مەكتەپ 9 گەكتار اۋماقتا ورنالاسىپ، 3400 وقۋشىعا ەسەپتەلگەن.
وقۋ كورپۋسىنان بولەك، كەشەن قۇرامىنا تەاتر، جارتىلاي وليمپيادالىق باسسەين، سپورت نىساندارى جانە جەكە بالاباقشا عيماراتى كىرەدى. قۇرىلىس جۇمىستارى 2024 جىلدىڭ ناۋرىز ايىندا باستالدى.
بۇل – ەلدەگى SABIS ءبىلىم بەرۋ جۇيەسى بويىنشا جۇمىس ىستەيتىن العاشقى وقۋ ورنى. باعدارلاما ۇلتتىق ستاندارتتارعا بەيىمدەلگەن جانە وقۋشىلاردى حالىقارالىق ەمتيحاندارعا جانە الەمنىڭ جەتەكشى ۋنيۆەرسيتەتتەرىنە تۇسۋگە دايىندايدى. وقىتۋ ءۇش تىلدە جۇرگىزىلەدى: نەگىزگى وقىتۋ ءتىلى – اعىلشىن ءتىلى، سونىمەن قاتار قازاق جانە ورىس تىلدەرى وقىتىلادى.
«ءبىزدىڭ ماقساتىمىز – استاناداعى وتباسىلارعا قازاقستاننان شىقپاي-اق ساپالى حالىقارالىق ءبىلىم الۋ مۇمكىندىگىن بەرۋ، SABISء-تىڭ 140 جىلعا جۋىق تاجىريبەسىن ۇلتتىق ءبىلىم تالاپتارىمەن جانە قازاقستاننىڭ مادەني قۇندىلىقتارىمەن ۇشتاستىرۋ. حالىقارالىق دەڭگەيدەگى ءبىلىم تەك شەتەلدە نەمەسە شەكتەۋلى وتباسىلار توبىنا عانا قولجەتىمدى مۇمكىندىك رەتىندە قابىلدانباۋى كەرەك دەپ ەسەپتەيمىز»، – دەدى SABIS پرەزيدەنتى جانە باس ديرەكتورى ۆيكتور سااد.
SABIS – 1886 جىلى نەگىزى قالانعان حالىقارالىق ءبىلىم بەرۋ جەلىسى، بۇگىندە بەس قۇرلىقتاعى 21 ەلدە ۇسىنىلعان.
مەكتەپتە وقۋ اقىسى سىنىپقا بايلانىستى 6،5 مىڭنان 8،6 مىڭ دوللارعا دەيىن وزگەرەدى.
بۇعان دەيىن استانا حالىقارالىق قارجى ورتالىعىنىڭ سوتى Haileybury Almaty بەدەلدى مەكتەبىنىڭ تالابى بويىنشا شەشىم شىعارعانى حابارلانعان بولاتىن. وقۋ ورنى اتا-انالاردان تولەنبەگەن ءبىلىم قىزمەتتەرى ءۇشىن 8،1 ميلليون تەڭگەنى ءساتتى ءوندىرىپ الدى.