بايقوڭىردا تۇراقتى جۇمىس ورنى مەن مۇلكى جوق ەر ادام اليمەنت تولەمەگەنى ءۇشىن اكىمشىلىك جاۋاپكەرشىلىككە تارتىلدى. ونىڭ كامەلەتكە تولماعان بالالارى الدىنداعى قارىز سوماسى 5 ميلليون تەڭگەدەن استى، دەپ حابارلايدى infohub.kz سايتى.
قىزىلوردا وبلىسى سوتتارىنىڭ رەسمي Telegram-ارناسىنىڭ مالىمەتىنشە، بايقوڭىر قالالىق سوتىندا ازاماتقا قاتىستى قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 669-بابىنىڭ 1-بولىگى بويىنشا اكىمشىلىك ءىس قارالدى.
ءىس ماتەريالدارىنا سايكەس، سوت بۇيرىعى نەگىزىندە ەر ادام كامەلەتكە تولماعان بالالارىن اسىراۋ ءۇشىن اليمەنت تولەۋگە مىندەتتى بولعان. الايدا، اتقارۋشىلىق قۇجاتتىڭ تالاپتارىن بىلە تۇرا، ول مىندەتتەمەلەرىن ورىنداۋدان جالتارعان.
قازىرگى ۋاقىتتا قارىز سوماسى 5 029 720 تەڭگەنى قۇرادى. قۇقىق بۇزۋشىنىڭ تۇراقتى جۇمىس ورنى، تابىسى جانە ونىڭ اتىنا تىركەلگەن مۇلكى جوق ەكەندىگى انىقتالدى.
سوت وتىرىسىندا ول تۇراقتى جۇمىسىنىڭ بولماۋىنا بايلانىستى مىندەتتەمەلەرىن ورىنداي الماعانىن ءتۇسىندىرىپ، بولاشاقتا قارىزدى وتەيتىنىنە سەندىردى.
سوت قاۋلىسىمەن ەر ادام ق ر اقبتك-نىڭ 669-بابىنىڭ 1-بولىگىندە كوزدەلگەن اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىلىپ، وعان 3 تاۋلىك مەرزىمگە اكىمشىلىك قاماققا الۋ جازاسى تاعايىندالدى.