باقاد اقىلى جولىمەن ءجۇرۋ قۇنى ەكى ەسەگە وسەدى، الايدا بۇل بارلىق اۆتوكولىك يەلەرىنە ەمەس، تەك قىزمەت اقىسىن ادال تولەمەيتىندەرگە اسەر ەتەدى، دەپ حابارلايدى infohub.kz سايتى.
بۇعان دەيىن 16 تامىزدان باستاپ ۇلكەن الماتى اينالما اۆتوموبيل جولىمەن (باقاد) ءجۇرۋ ەكى ەسە قىمباتتايتىنى تۋرالى اقپارات تاراعان ەدى. الايدا ق ر كولىك مينيسترلىگى جاڭا تاريفتەر بارلىق قازاقستاندىقتارعا قاتىستى ەمەس ەكەنىن ناقتىلادى.
«نەگىزگى وزگەرىس مىنادا: جول اقىسىن ۋاقىتىندا تولەيتىن پايدالانۋشىلار ءۇشىن ءجۇرۋ قۇنى ءىس جۇزىندە وزگەرمەيدى. وسىلايشا، ادال پايدالانۋشىلار ءۇشىن ءجۇرۋ قۇنى بۇرىنعى دەڭگەيدە ساقتالادى جانە كولىك قۇرالىنىڭ ساناتىنا قاراي 0،07 اەك-تەن (302،75 تەڭگە) 0،22 اەك-كە (951،5 تەڭگە) دەيىن قۇرايدى. جول اقىسىن الدىن الا نەمەسە جول ءجۇرۋ تىركەلگەننەن كەيىن جەتى جۇمىس كۇنى ىشىندە تولەگەن كەزدە بەلگىلەنگەن ءتاريفتىڭ 50 پايىزى مولشەرىندە جەڭىلدىك قولدانىلادى»، – دەپ حابارلادى ۆەدومستۆودان.
ءتاريفتىڭ ءوسۋى تەك بازالىق ستاۆكالارعا اسەر ەتتى، ولار پايدالانۋشى جول ءجۇرۋ تىركەلگەننەن كەيىن جەتى جۇمىس كۇنى ىشىندە اقى تولەمەگەن جاعدايدا عانا قولدانىلادى. ماسەلەن، مۇنداي بۇزۋشىلىقتار كەزىندە قازاقستاندىقتارعا تولەۋگە تۋرا كەلەدى: جەڭىل اۆتوكولىكتەر ءۇشىن – 0،14 اەك (605،5 تەڭگە)؛ 16 ورىنعا دەيىنگى اۆتوبۋستار مەن جۇك كوتەرگىشتىگى 2،5 تونناعا دەيىنگى جۇك كولىكتەرى ءۇشىن – 0،16 اەك (692 تەڭگە)؛ 32 ورىنعا دەيىنگى اۆتوبۋستار مەن 5،5 تونناعا دەيىنگى جۇك كولىكتەرى ءۇشىن – 0،28 اەك (1 211 تەڭگە)؛ 32 ورىننان اساتىن اۆتوبۋستار مەن جۇك كوتەرگىشتىگى 10 تونناعا دەيىنگى جۇك كولىكتەرى ءۇشىن – 0،32 اەك (1 384 تەڭگە)؛ جۇك كوتەرگىشتىگى 10-نان 15 تونناعا دەيىنگى جۇك كولىكتەرى ءۇشىن – 0،4 اەك (1 730 تەڭگە)؛ جۇك كوتەرگىشتىگى 15 توننادان اساتىن جۇك كولىكتەرى، ونىڭ ىشىندە سەدەلنىي تارتقىشتار ءۇشىن – 0،44 اەك (1 903 تەڭگە).
«باسقاشا ايتقاندا، وزگەرىستەر تولەم ءتارتىبىن جاقسارتۋعا باعىتتالعان جانە ۋاقىتىندا تولەيتىن پايدالانۋشىلارعا اسەر ەتپەيدى. ءجۇرۋ قۇنىن ەسەپتەۋ ءپرينسيپى بۇرىنعىداي. تولەم مولشەرى، بۇرىنعىداي، كولىك قۇرالىنىڭ ساناتىنا جانە اقىلى ۋچاسكەدە بولعان ۋاقىتقا (ءبىر ساعات ىشىندە) بايلانىستى. مارشرۋت ۇزاقتىعى ءجۇرۋ قۇنىنا اسەر ەتپەيدى»، – دەپ قوستى كولىك مينيسترلىگىندە.
سونداي-اق ۆەدومستۆو الماتى وبلىسىنىڭ تالعار، قاراساي جانە ىلە اۋداندارىنىڭ تۇرعىندارى ءۇشىن جەڭىلدىك شارتتارى وزگەرىسسىز ساقتالاتىنىن ناقتىلادى. بۇل ساناتتاعى پايدالانۋشىلار ءۇشىن ايلىق جانە جىلدىق ابونەمەنتتەردىڭ قۇنى بۇرىنعى قالپىندا قالادى.