ادۆوكات عازيز ىنتىقباەۆتىڭ ايتۋىنشا، قۋاندىق بيشىمباەۆتىڭ نەمەرە اعاسى باقىتجان بايجانوۆ بۇگىن بوستاندىققا شىعىپ، وتباسىنا قايتادى. بۇل تۋرالى infohub.kz حابارلايدى.
بۇگىن الەۋمەتتىك جەلىلەردە قۋاندىق بيشىمباەۆتىڭ نەمەرە اعاسى باقىتجان بايجانوۆتىڭ بوستاندىققا شىعاتىنى تۋرالى اقپارات پايدا بولدى. اقپارات اگەنتتىگىنىڭ ءتىلشىسى سوتتا بايجانوۆتىڭ مۇددەسىن قورعاعان ادۆوكات عازيز ىنتىقباەۆتان پىكىر سۇرادى. ادۆوكات بۇل اقپاراتتى راستادى.
«بۇگىن سوت وتىرىسى ءوتتى، وندا سوت باقىتجان بايجانوۆقا قاتىستى امنيستيا اكتىسىن قولدانىپ، ونى دەرەۋ بوساتۋ تۋرالى شەشىم قابىلدادى. وتەلمەگەن جازا مەرزىمى ءۇش ايدان ءسال استام بولدى. باقىتجان بۇگىن-اق وتباسىنا قايتادى»، — دەدى ول.
ءتىلشى باقىتجان بايجانوۆتىڭ بوستاندىققا شىققانىن ناقتىلادى. «بۇگىن ستەپنوگورسك قالالىق سوتى سوت اكتىسىن قىلمىستىق-اتقارۋ جۇيەسى مەكەمەسىنە جىبەرەدى. مەكەمە سوت قاۋلىسىن العاننان كەيىن بايجانوۆتى دەرەۋ بوساتۋى كەرەك»، — دەپ جاۋاپ بەردى ىنتىقبايەۆ.
بيىلعى جىلدىڭ ءساۋىر ايىنىڭ باسىندا قۋاندىق بيشىمباەۆتىڭ تۋىسى باقىتجان بايجانوۆ قايتادان سوتقا جۇگىنىپ، اقتالۋىن نەمەسە جازاسىن جەڭىلدەتۋدى سۇراعانىن جازعان بولاتىنبىز.
مامىر ايىندا بايجانوۆتىڭ ءىسى بويىنشا سوت وتىرىسى ءوتتى. سوت شەشىمىمەن بايجانوۆقا قاتىستى ۇكىم وزگەرىسسىز قالدىرىلىپ، كاسساسيالىق شاعىم قاناعاتتاندىرىلمادى.
ەسكە سالايىق، سالتانات نۇكەنوۆانى ولتىرگەنى جانە ونى ازاپتاعانى ءۇشىن قۋاندىق بيشىمبايەۆ 24 جىلعا باس بوستاندىعىنان ايىرىلدى. سونداي-اق سوت بايجانوۆتى «جاسىرۋ» بابى بويىنشا قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىدى. وعان ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە 4 جىل باس بوستاندىعىنان ايىرۋ جازاسى تاعايىندالدى. 2024 جىلعى 26 ماۋسىمدا استانا سوتى ۇكىمدى وزگەرىسسىز قالدىردى.
الايدا 2025 جىلدىڭ جازىندا بايجانوۆ امنيستيا تۋرالى وتىنىشپەن سوتقا جۇگىنگەن بولاتىن. كەيىن سوتتالعانعا امنيستيا قولدانىلىپ، جازا مەرزىمى قىسقارتىلعانى بەلگىلى بولدى.