كوپتەگەن اتا-انا بالدى پايدالى ءتاتتى دەپ سانايدى، الايدا ول ءبىر جاسقا دەيىنگى بالاعا ەلەۋلى ءقاۋىپ ءتوندىرۋى مۇمكىن. الماتىلىق 25 جىلدىق تاجىريبەسى بار پەدياتر-ينفەكسيونيست ساۋلە سىرعاباەۆا Threads الەۋمەتتىك جەلىسىندە بالدىڭ نارەستەلەرگە تيگىزەتىن ىقتيمال سالدارى تۋرالى ايتىپ بەردى، دەپ حابارلايدى infohub.kz.
«نەگە بالدان كەيىن نارەستە باسىن ۇستاي الماي قالادى؟ ءبارى بالدا جاسىرىنۋى مۇمكىن بوتۋليزم سپورالارىندا»، – دەپ جازدى ول.
دارىگەر ەرەسەكتەردىڭ ىشەگى جەتىلگەن، سوندىقتان سپورالار ءونىپ شىعا المايدى – ولار ترانزيتپەن ءوتىپ، تابيعي جولمەن شىعارىلادى. «ال ءبىر جاسقا دەيىنگى نارەستەنىڭ ىشەگى ءالى بوس دەۋگە بولادى، ميكروفلورا قالىپتاسپاعان، سوندىقتان سپورالار ىشەكتىڭ ىشىندە ءونىپ، سول جەردە توكسين شىعارا باستاۋعا مۇمكىندىك الادى»، – دەپ ءتۇسىندىردى مامان.
پەدياتردىڭ ايتۋىنشا، بۇدان كەيىن توكسين جۇيكەدەن بۇلشىقەتكە سيگنال بەرۋدى بلوكتايدى. ەڭ الدىمەن مويىن، بەت جانە جۇتىنۋ بۇلشىقەتتەرى زارداپ شەگەدى. «قورىتىندى: بالدى كەز كەلگەن تۇردە (ءتىپتى پىسىرىلگەن تاعامداردا، ۇيدە جاسالعان توساپتاردا، ەمىزىككە جاعىپ، سۇتپەن قوسىپ) 12 ايعا دەيىن بەرۋگە بولمايدى. تىنىش كۇتىپ، ءبىر جاسقا تولعان سوڭ بالانى بالمەن تانىستىرامىز»، – دەپ كەڭەس بەردى ول.
ەسكە سالايىق، اۋرۋ بالدى تۇتىنعاننان كەيىن بىرنەشە ساعاتتان ەكى اپتاعا دەيىنگى ارالىقتا بايقالۋى مۇمكىن. نەگىزگى بەلگىلەر: قاتتى جانە ۇزاققا سوزىلعان ءىش قاتۋ؛ جالپى بۇلشىقەت السىزدىگى (بالا «بوس» كورىنەدى)؛ ەنجارلىق، تابەتتىڭ جوعالۋى جانە جۇتىنۋدىڭ قيىنداۋى، ءالسىز ايقاي؛ نارەستە باسىن سەنىمدى ۇستاي المايدى.
بۇعان دەيىن پەدياتر نۇرجامال اۋباكىروۆا Instagram-داعى پاراقشاسىندا بالالارعا قازىرگى كلينيكالىق ۇسىنىستارعا قاراماستان ءجيى تاعايىندالاتىن التى تانىمال ءدارىحانالىق پرەپاراتتى اتاعان بولاتىن.