2026 جىلدىڭ سوڭىنا دەيىن قازاقستاننىڭ تاعى ءتورت وڭىرىندە مۇگەدەك بالالارعا ۇيدە وڭالتۋ قىزمەتى قولجەتىمدى بولادى، دەپ حابارلايدى infohub.kz سايتى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مۇگەدەكتىگى بار ادامداردى الەۋمەتتىك قورعاۋ ماسەلەلەرى جونىندەگى ۇيلەستىرۋ كەڭەسىنىڭ وتىرىسىندا «QH مۇگەدەك بالالاردى ءۇي جاعدايىندا وڭالتۋ» جوباسىنىڭ ارالىق قورىتىندىسى شىعارىلدى.
ءقازىر باعدارلاما «قازاقستان حالقىنا» قوعامدىق قورىنىڭ قولداۋىمەن ۇلتتىق الەۋمەتتىك قورعاۋ سالاسىن دامىتۋ عىلىمي ورتالىعىمەن بىرلەسىپ جۇزەگە اسىرىلۋدا. ول شىمكەنت، قىزىلوردا، پاۆلودار وبلىستارى مەن اباي وبلىسىندا قولدانىستا.
جوبا باستالعالى بەرى 628 بالا ءۇي جاعدايىندا كەشەندى وڭالتۋدان ءوتتى. ولارعا 405 يننوۆاسيالىق تەحنيكالىق وڭالتۋ قۇرالى بەرىلدى. مينيسترلىكتىڭ دەرەگىنشە، 470 بالادا وڭ وزگەرىستەر بايقالدى – بۇل باعدارلاماعا قاتىسۋشىلاردىڭ 75% جۋىعى. تۇراقتى جاتتىعۋلاردىڭ ارقاسىندا 130 بالا باسىن سەنىمدى ۇستاۋعا، 76 بالا ءوز بەتىمەن وتىرۋعا، 78 بالا تىرەۋىشپەن تۇرۋعا ۇيرەنسە، 34 بالا العاشقى قادامدارىن جاسادى.
اباي وبلىسىنىڭ تۇرعىنى نازىم راشيت قىزىنىڭ ۇلى باعدارلاماعا ءبىر جارىم جىلدان بەرى قاتىسىپ كەلەدى. ونىڭ ايتۋىنشا، وسى ۋاقىت ىشىندە بالا اياعىندا سەنىمدىرەك تۇرا باستاعان، ويىنشىقتاردى ءوزى الىپ، بوگدە ادامنىڭ كومەگىنسىز تاماق ىشۋگە تىرىسادى. «ءبىزدىڭ وتباسى ءۇشىن بۇل – ۇلكەن جەتىستىك. ءبىز بۇل جوبا ءۇشىن شىن جۇرەكتەن العىس ايتامىز جانە ونىڭ جالعاسىن تاۋىپ، كوپتەگەن بالاعا قولجەتىمدى بولاتىنىنا ۇمىتتەنەمىز»، — دەدى ول.
جوبانىڭ ەرەكشەلىكتەرىنىڭ ءبىرى – وتباسىلاردى سيفرلىق باقىلاۋ كۇندەلىگى ارقىلى تۇراقتى قاشىقتىقتان قولداۋ. وڭالتۋشىلار بالانىڭ جاعدايىن باقىلاپ، ۇيدەگى جاتتىعۋلاردىڭ ناتيجەسىن تالداپ، قاجەت بولعان جاعدايدا قالپىنا كەلتىرۋ باعدارلاماسىن تۇزەتەدى. مۇنداي فورمات شالعاي ەلدى مەكەندەردە تۇراتىن بالالارعا ساپالى كومەك كورسەتۋگە مۇمكىندىك بەردى. بولاشاقتا سيفرلىق پلاتفورمانى اتا-انالارعا ارنالعان وقۋ ماتەريالدارىمەن، لوگوپەديالىق جاتتىعۋلارمەن جانە جاڭا قولداۋ سەرۆيستەرىمەن تولىقتىرۋ جوسپارلانۋدا. سونىمەن قاتار، اتا-انالاردىڭ تاجىريبە الماسىپ، ءبىر-بىرىن قولداۋى ءۇشىن تۇراقتى بەتپە-بەت كەزدەسۋلەر كوزدەلگەن.
2026 جىلدىڭ سوڭىنا دەيىن ۇيدە وڭالتۋ ماڭعىستاۋ، باتىس قازاقستان، سولتۇستىك قازاقستان وبلىستارى مەن ۇلىتاۋ وبلىسىنىڭ تۇرعىندارىنا قولجەتىمدى بولادى. وتىرىستى قورىتىندىلاي كەلە، ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ جوبانى ودان ءارى دامىتۋ تەك مەملەكەتتىڭ، جەرگىلىكتى اتقارۋشى ورگانداردىڭ جانە قوعامدىق ۇيىمداردىڭ بىرلەسكەن جۇمىسى ارقىلى عانا مۇمكىن ەكەنىن اتاپ ءوتتى.