يندونەزيانىڭ بالي ارالىنداعى قاسيەتتى ءدىني مەرەكەنى قورلاعان شۆەيساريالىق تۋريست ءبىر جىلعا باس بوستاندىعىنان ايىرىلدى. بۇل تۋرالى infohub.kz سايتى حابارلايدى.
26 جاستاعى لۋسيان اندرين زگراگگەن Nyepi مەرەكەسى كەزىندە بوس جاعاجايعا بارىپ، ونى "اقىلسىز" دەپ سيپاتتاعان ۆيدەوسىن Instagram-دا جاريالاعان. كەيىن بۇل ۆيدەو جويىلعان، ءبىراق ول بالي تۇرعىندارىنىڭ اشۋىن تۋدىرعان.
Nyepi — تىنىشتىق كۇنى دەپ اتالاتىن جىل سايىنعى مەرەكە. بۇل كۇنى ادەتتە ءارقاشان قايناپ جاتقان تۋريستىك ارال تىنىشتىققا بولەنەدى: تۇرعىندار ۇيدە وتىرىپ، قاتتى دىبىس شىعارماۋعا تىرىسادى. بۇل شەكتەۋلەر دىنگە قاراماستان ارالداعى بارلىق ادامعا، ونىڭ ىشىندە تۋريستەرگە دە قولدانىلادى.
Nyepi كۇنى ارالداعى اۋەجاي جابىلىپ، ينتەرنەت وشىرىلەدى. ويىن-ساۋىق ءىس-شارالارى شەكتەلىپ، ءتىپتى ەلەكتر ەنەرگياسىن پايدالانۋ ۇسىنىلمايدى. تۇرعىندار مەرەكەگە دەيىن ازىق-ت ۇلىك جيناپ الادى، سوندىقتان ولار مەرەكە كۇنى ۇيدە وتىرادى.
بيىلعى Nyepi 19 ناۋرىزعا سايكەس كەلدى. جەرگىلىكتى باق-تىڭ حابارلاۋىنشا، زگراگگەن وسى كۇنى ۇيدەن شىعۋعا تىيىم سالىنعانىنا قاراماستان، ءوزىنىڭ Instagram-پاراقشاسىندا بىلاي دەپ جازعان: "بۇل نە دەگەن اقىلسىزدىق!".
Associated Press اگەنتتىگىنىڭ حابارلاۋىنشا، ءتوراعالىق ەتۋشى سۋديا: "ايىپتالۋشىنىڭ ارەكەتى باليلىكتەردى رەنجىتىپ، ولاردىڭ سەنىمىنە زيان كەلتىردى جانە جۇرتشىلىقتىڭ اشۋىن تۋدىردى"، — دەدى.
سوت پروسەسى كەزىندە زگراگگەن Nyepi شەكتەۋلەرىنىڭ اۋقىمىن تۇسىنبەگەنىن جانە باليلىكتەردى رەنجىتكىسى كەلمەگەنىن ايتتى. Associated Press اگەنتتىگىنىڭ حابارلاۋىنشا، ول سوتتا: "مەن ىستەگەنىم ءۇشىن قاتتى وكىنەمىن، باليلىكتەردەن كەشىرىم سۇرايمىن"، — دەدى.
بۇعان دەيىن دە تۋريستەر Nyepi ەرەجەلەرىن بۇزعانى ءۇشىن قاماۋعا الىنىپ نەمەسە ەلدەن شىعارىلعان بولاتىن.
باليدە تۋريستەر سانى پاندەمياعا دەيىنگى دەڭگەيدەن اسىپ ءتۇستى. وتكەن جىلى ارالعا رەكوردتىق جەتى ميلليون شەتەلدىك تۋريست كەلدى. ءبىراق ءتۋريزمنىڭ وسۋىمەن قاتار جەرگىلىكتى تۇرعىندار مەن بيلىكتى الاڭداتاتىن تەرىس مىنەز-ق ۇلىق تا ارتتى. شەتەلدىكتەر ءدىني ورىنداردا ادەپسىز ارەكەتتەرى، تۋريستەرگە ارنالعان وقشاۋ ايماقتار قۇرۋى جانە جول ەرەجەلەرىن بۇزۋى ءۇشىن جازالاندى.
بيلىك ارالداعى تۋريستەردى قاتاڭ باقىلاۋعا الۋعا جانە ءتارتىپسىز شەتەلدىكتەرگە قارسى كۇرەسكە ۋادە بەردى.