قازاقستان ۇكىمەتى بالقاش قالاسىندا جەكە ينۆەستيسيالار ەسەبىنەن 750 ملرد تەڭگەگە جاڭا مىس بالقىتۋ زاۋىتىن سالۋدى ماقۇلدادى. مەملەكەت باسشىسىنىڭ تاپسىرماسىن ورىنداۋ ماقساتىندا پرەمەر-مينيستر ولجاس بەكتەنوۆ ءتيىستى قاۋلىعا قول قويدى، دەپ حابارلايدى infohub.kz سايتى.
جوبانى «Qazaq Smelter» ج ش س جۇزەگە اسىرادى. قۇرىلىس 2027 جىلى باستالىپ، پايدالانۋعا بەرۋ 2030 جىلعا جوسپارلانعان. زاۋىت 1،2 مىڭعا جۋىق ادامدى تۇراقتى جۇمىسپەن قامتاماسىز ەتەدى. ىسكە قوسىلعان كەزدە قىزمەتكەرلەردىڭ 90%-ى قازاقستاندىق ماماندار بولادى، ال بەس جىل ىشىندە بۇل ۇلەس 95%-عا جەتەدى. ينۆەستور سونىمەن قاتار قاراعاندى وبلىسىنىڭ وقۋ ورىندارىندا 50 ستۋدەنتتى وقىتۋدى قارجىلاندىرۋعا مىندەتتەندى.
كاسىپورىننىڭ ىسكە قوسىلۋى قازاقستانداعى مىس ءوندىرىسىن ءبىر جارىم ەسەگە ارتتىرۋعا مۇمكىندىك بەرەدى — قازىرگى كورسەتكىشتەردەن جىلىنا 800 مىڭ توننادان استامعا دەيىن. زاۋىتتىڭ جىلدىق جوبالىق قۋاتى: كاتودتى مىس — 300 مىڭ توننا، التىن — 10 توننا، كۇمىس — 300 توننا، كۇكىرت قىشقىلى — 1،5 ملن توننادان استام. جوعارى قوسىلعان قۇنى بار دايىن ءونىمنىڭ ەكسپورتى 460 مىڭ توننادان 760 مىڭ تونناعا دەيىن وسەدى.
بۇعان دەيىن «كۋرسيۆ» «قازاقمىس» كومپانياسى قىتايمەن ىنتىماقتاستىقتا بالقاش مىس بالقىتۋ زاۋىتىن جاڭعىرتۋدى جوسپارلاپ وتىرعانىن جازعان بولاتىن.