بالقاشتا قالانىڭ باستى كاسىبي مەرەكەلەرىنىڭ ءبىرى – مەتاللۋرگتەر كۇنى اتاپ ءوتىلدى. سالادا التى مىڭنان استام تۇرعىن جۇمىس ىستەيدى، كوبى وتباسىلىق ەڭبەك اۋلەتتەرىن جالعاستىرۋدا. سالتاناتتى شارا بارىسىندا ۇزدىك قىزمەتكەرلەرگە مەملەكەتتىك جانە ۆەدومستۆولىق ناگرادالار تابىستالىپ، ءوڭىر باسشىلىعى مەن «قازاقمىس» كورپوراسياسى جاڭا وندىرىستىك جانە الەۋمەتتىك جوبالار تۋرالى ايتتى، دەپ حابارلايدى infohub.kz.
تەك 2026 جىلدىڭ ءبىرىنشى جارتىجىلدىعىندا عانا بالقاش مىس بالقىتۋ زاۋىتى 96 مىڭ توننادان استام كاتودتى مىس ءوندىردى.
سالا قىزمەتكەرلەرىن كاسىبي مەرەكەمەن قۇتتىقتاۋعا قاراعاندى وبلىسىنىڭ اكىمى ەرماعانبەت بولەكپايەۆ كەلدى. ول مەتاللۋرگتەردىڭ ەڭبەگى ءوڭىر ەكونوميكاسىنىڭ نەگىزگى تىرەكتەرىنىڭ ءبىرى بولىپ قالا بەرەتىنىن اتاپ ءوتتى.
«قازاقستان پرەزيدەنتى قاسىم-جومارت توقايەۆ ەڭبەك ادامى قوعامدا ەرەكشە قۇرمەتكە يە بولۋى كەرەك ەكەنىن بىرنەشە رەت ايتقان. بۇل سوزدەر مەتاللۋرگتەرگە تولىعىمەن قاتىستى. سىزدەردىڭ كاسىبي شەبەرلىكتەرىڭىزدىڭ ارقاسىندا قاراعاندى وبلىسى ەلدىڭ ونەركاسىبىندە كوشباسشى پوزيسيالاردى ساقتاپ وتىر»، — دەدى بولەكپايەۆ.
ونىڭ ايتۋىنشا، 2025 جىلى وبلىستىڭ ونەركاسىپتىك ءوندىرىس كولەمى 5،3 ترلن تەڭگەدەن استى، ونىڭ شامامەن 3،8 ترلن تەڭگەسى وڭدەۋ ونەركاسىبىنە تيەسىلى بولدى.
ءوڭىر باسشىسى ەڭبەك اۋلەتتەرىنىڭ سالانى دامىتۋعا قوسقان ۇلەسىن اتاپ، مىسال رەتىندە جالپى ەڭبەك ءوتىلى ءجۇز جىلدان اسقان اقبەرگەنوۆتەر وتباسىن كەلتىردى.
شارا بارىسىندا ۇزدىك قىزمەتكەرلەر «ەڭبەك داڭقى»، «قۇرمەتتى مەتاللۋرگ» توسبەلگىلەرىمەن جانە «ەڭبەك ارداگەرى» مەدالىمەن ماراپاتتالدى.
«قازاقمىس كورپوراسياسى» ج ش س باسقارما ءتوراعاسى رۋسلان وسكەنالى بالقاش وندىرىستىك الاڭىنىڭ دامۋى تۋرالى ايتتى. ونىڭ ايتۋىنشا، كومپانيانىڭ باستى باسىمدىعى – قىزمەتكەرلەردىڭ قاۋىپسىزدىگى مەن ءوندىرىستى جاڭعىرتۋ.
«ءبىرىنشى جارتىجىلدىقتا بالقاش مىس بالقىتۋ زاۋىتى 96 مىڭ توننادان استام كاتودتى مىس شىعاردى. بۇل ساننىڭ ارتىندا مىڭداعان قىزمەتكەردىڭ كۇندەلىكتى ەڭبەگى تۇر. بۇگىن ءبىز وندىرىستىك ينفراقۇرىلىمدى جاڭارتىپ، جابدىقتاردى مودەرنيزاسيالاپ، ەڭبەك جاعدايلارىن جاقسارتىپ، الەۋمەتتىك باعدارلامالاردى دامىتۋدامىز»، — دەپ اتاپ ءوتتى ول.
قازىرگى ۋاقىتتا كاسىپورىندا پۆ-1 جانە پۆ-2 بالقىتۋ اگرەگاتتارىنا كۇردەلى جوندەۋ جۇرگىزىلىپ، وندىرىستىك عيماراتتاردىڭ شاتىرلارى مەن نوسەرلى كارىز جۇيەسى جاڭارتىلىپ، زاماناۋي كونديسيونەرلەۋ جۇيەلەرى ورناتىلۋدا.
جىل سوڭىنا دەيىن بالقاش وندىرىستىك الاڭى جالپى قۇنى 166 ملن تەڭگەدەن استام ەكى جاڭا جەدەل جاردەم كولىگىن الادى. سونىمەن قاتار، «گيگيەنا» كورپوراتيۆتىك باعدارلاماسى بويىنشا 2026 جىلى 24 الەۋمەتتىك-تۇرمىستىق نىساندى مودەرنيزاسيالاۋ جوسپارلانعان. وسى ماقساتتارعا كومپانيا 754 ملن تەڭگە بولەدى.
«قازامىس كورپوراسياسى» ج ش س بايقاۋ كەڭەسىنىڭ ءتوراعاسى نۇرمۇحامبەت ابدىبەكوۆ كومپانيانىڭ الەۋمەتتىك جوبالارى تۋرالى ايتتى.
ونىڭ ايتۋىنشا، كومپانيا تەك وندىرىسكە عانا ەمەس، كاسىپورىندار جۇمىس ىستەيتىن قالالاردىڭ دامۋىنا دا ينۆەستيسيا سالادى.
«“قازاقمىس” الەۋمەتتىك جانە ينفراقۇرىلىمدىق جوبالارىنىڭ جالپى پورتفەلى شامامەن 45 ملرد تەڭگەنى قۇرايدى. بالقاشتا جاقىن جىلدارى زاماناۋي بالاباقشا مەن سپورتتىق-تۋريستىك بازا سالۋ جوسپارلانۋدا. بۇل قالانىڭ دامۋىنا عانا ەمەس، ءبىزدىڭ قىزمەتكەرلەرىمىز بەن ولاردىڭ وتباسىلارىنىڭ ءومىر ساپاسىنا قوسقان ۇلەس»، — دەپ اتاپ ءوتتى نۇرمۇحامبەت ابدىبەكوۆ.
بالقاشتاعى مەرەكەلىك شارالار فەستيۆال، سپورتتىق جارىستار، كونسەرتتىك باعدارلاما جانە ساليۋتپەن جالعاسادى.