تايلاند استاناسىن قاتتى مۋسسوندىق جاڭبىرلار قامتىدى: بانگكوك بيلىگى قالانىڭ بارلىق 50 اۋدانىندا تابيعي اپات رەجيمىن ەنگىزدى. سەبەبى — نوسەر جاڭبىر مەن كەنەتتەن بولاتىن سۋ تاسقىنى ءقاۋپى، دەپ حابارلايدى infohub.kz سايتى.
جاريالانىم دەرەگىنشە، تاۋلىك ىشىندە كەيبىر اۋدانداردا 210 مم-گە دەيىن جاۋىن-شاشىن ءتۇستى. سۋ ونداعان كوشەگە شىعىپ، كولىك قوزعالىسى ءىس جۇزىندە توقتاپ قالدى، ال كەيبىر تۇرعىندار قايىقپەن ءجۇرۋدى تاڭداپ وتىر. اسىرەسە استانانىڭ شىعىسىندا جاعداي قيىن — وندا كانالدار تولىپ، سۋ كوشەلەردەن تارتىلماي تۇر.
جەرگىلىكتى بيلىك تۇرعىنداردان زاتتارى مەن تەحنيكاسىن بيىك جەرگە كوتەرىپ، مۇمكىندىگىنشە ۇيدەن شىقپاۋدى سۇرادى.
باسىلىم اتاپ وتكەندەي، داۋىلدى ەسكەرتۋ 27 قىركۇيەككە دەيىن كۇشىندە، ءبىراق اۋا رايىنىڭ جاقسارۋى مەن سۋدىڭ تارتىلۋى 28–29 قىركۇيەككە قاراي كۇتىلەدى.
تۋريستەرگە جولعا، اسىرەسە اۋەجايلارعا، ۆوكزالدارعا نەمەسە استانانىڭ نەگىزگى كولىك توراپتارىنا بارار جولدا كوبىرەك ۋاقىت قالدىرۋعا كەڭەس بەرىلەدى. جولعا شىعار الدىندا جول جاعدايىن تەكسەرىپ، توتەنشە قىزمەتتەردىڭ، تۋريزم باسقارماسىنىڭ جانە تۋريستىك پوليسيانىڭ جەدەل جەلىلەرىن پايدالانۋ ۇسىنىلادى.
ايتا كەتەيىك، بانگكوك ايماعىندا ماۋسىمنان قاراشاعا دەيىن جاڭبىرلى ماۋسىم جالعاسادى. ەڭ ىلعالدى اۋا رايى، كوپ تروپيكالىق نوسەر مەن نايزاعاي قىركۇيەك پەن قازاندا بايقالادى.