2026 جىلدىڭ ءبىرىنشى جارتىجىلدىعىنىڭ قورىتىندىسى بويىنشا Bank RBK 27 ملرد تەڭگە پايدا تاپتى. بۇل وتكەن جىلدىڭ سايكەس كەزەڭىمەن سالىستىرعاندا 21%-عا، ياعني 7،2 ملرد تەڭگەگە از. پايدانىڭ ازايۋىنا نەگىزىنەن پايىزدىق ەمەس كىرىستەردىڭ قىسقارۋى اسەر ەتتى، دەپ حابارلايدى infohub.kz سايتى.
بانكتىڭ پايىزدىق ءتۇسىمى 12%-عا ءوسىپ، 169 ملرد تەڭگەگە جەتتى. اتاپ ايتقاندا، كليەنتتەرگە بەرىلگەن كرەديتتەر بويىنشا پايىزدىق كىرىس 139 ملرد تەڭگەنى قۇرادى. پايىزدىق شىعىستار 114 ملرد تەڭگە بولعاندا، تازا پايىزدىق كىرىس 54،7 ملرد تەڭگە بولىپ، ازداپ قانا — 290 ملن تەڭگەگە ءوستى.
بانكتىڭ كوميسسيالىق كىرىستەرى 2،8 ملرد تەڭگەگە تومەندەپ، 7،4 ملرد تەڭگەگە جەتتى. شەتەل ۆاليۋتاسىمەن جاسالعان وپەراسيالاردان تۇسكەن پايدا 1،7 ملرد تەڭگەگە ازايىپ، 18 ملرد تەڭگە بولدى. ال تۋىندى قارجى قۇرالدارىمەن — ۆاليۋتالىق سۆوپتار مەن فورۆاردتىق ۆاليۋتالىق كەلىسىمدەرمەن — جاسالعان وپەراسيالار كومپانياعا 10،9 ملرد تەڭگە شىعىن اكەلدى، ءبىر جىل بۇرىن بۇل وپەراسيالاردان 4 ملرد تەڭگە پايدا بولعان ەدى.
سونىمەن قاتار بانكتىڭ قارجىلىق مىندەتتەمەلەردى العاشقى تانۋ كەزىندەگى پايداسى ايتارلىقتاي — 5،64 ەسەگە — ازايىپ، 1،78 ملرد تەڭگە بولدى (ءبىر جىل بۇرىن 10 ملرد تەڭگە ەدى). بانكتىڭ باسقا دا وپەراسيالىق كىرىستەرى ەكى ەسە ءوسىپ، 3،7 ملرد تەڭگەگە جەتتى. ناتيجەسىندە بانكتىڭ پايىزدىق ەمەس كىرىستەرى 2،5 ەسەگە قۇلدىراپ، 16 ملرد تەڭگە بولدى. ال پايىزدىق ەمەس شىعىستار 24 ملرد تەڭگەنى قۇرادى.
ءبىرىنشى جارتىجىلدىقتا Bank RBK 3،5 ملرد تەڭگە تابىس سالىعىن تولەدى — 2025 جىلدىڭ ءبىرىنشى جارتىجىلدىعىمەن سالىستىرعاندا 24%-عا از. بۇل رەتتە سالىق تولەۋگە دەيىنگى پايدا 21%-عا تومەندەدى.
Bank RBK اكتيۆتەرى 4%-عا ءوسىپ، 2،8 ترلن تەڭگەگە جەتتى. مىندەتتەمەلەرى 4،7%-عا ارتىپ، 2،6 ترلن تەڭگە بولدى.
ايتا كەتەيىك، KASE دەرەكتەرى بويىنشا Bank RBK اكسيالارىنىڭ 84،81%-ى «كسس فينانس» كومپانياسىنا تيەسىلى. ول ارقىلى بانكتى قازاقستانداعى ەڭ باي ادامدار تىزىمىندە ەكىنشى ورىندا تۇرعان، بايلىعى $5،9 ملرد بولاتىن كاسىپكەر ۆلاديمير كيم باقىلايدى.
ەسكە سالايىق، ماۋسىمدا Bank RBK اكتيۆتەرى بويىنشا ەلدە 7-ورىنعا كوتەرىلدى، بۇعان دەيىن 10-ورىندا بولاتىن.