قازاقستاندا نەسيە بەرۋ ەرەجەلەرى كۇشەيتىلدى: ەندى بانكتەر قارىز الۋشىلاردىڭ قارجىلىق جاعدايىن مۇقيات تەكسەرەتىن بولادى، دەپ حابارلايدى infohub.kz سايتى.
ۇلتتىق بانك نەسيە بەرۋدى رەتتەيتىن قاۋلىعا وزگەرىستەر ەنگىزدى. ەندى نەسيە قابىلەتتىلىگىن باعالاۋ كەزىندە بانكتەر كليەنتتىڭ سوڭعى التى ايداعى قارجىلىق تاريحىن ەسكەرەدى، ال مەنشىكتى شوتتار اراسىنداعى اۋدارىمدار ارقىلى تابىستى جاساندى تۇردە كوتەرۋ ەندى وتپەيدى.
ەسەپتەۋ كەزىندە جالاقى، زەينەتاقى، ستيپەنديا جانە الەۋمەتتىك تولەمدەر ەسكەرىلەدى. اقشالاي تۇسىمدەر كەمىندە ەكى ءتۇرلى ايدا تىركەلۋى ءتيىس، سودان كەيىن بانك ورتاشا ايلىق تابىستى انىقتايدى. سونداي-اق قارىز الۋشىنىڭ مىندەتتەمەلەرىن باقىلاۋ كۇشەيتىلدى: ەسەپتەۋگە نەسيەلەر، ميكرونەسيەلەر، مەرزىمى وتكەن تولەمدەر جانە كەيبىر ەسەپتەن شىعارىلعان قارىزدار الىنادى. ەگەر تولەمدەر مولشەرى تابىسقا قاتىستى تىم ۇلكەن بولسا، جاڭا نەسيە بەرۋدەن باس تارتىلۋى مۇمكىن. سونىمەن قاتار، بانكتەر قارىزدىڭ تابىسقا قاتىناسى كوەففيسيەنتىن (قتق) قولداناتىن بولادى.
ۇلتتىق بانكتىڭ اقپارات جانە كوممۋنيكاسيالار دەپارتامەنتىنىڭ ديرەكتورى – ءباسپاسوز حاتشىسى اسان احمەتجاننىڭ تۇسىندىرۋىنشە، قتق قارىز الۋشىنىڭ جىلدىق تابىسىنا قاتىستى قارىز سوماسىن كورسەتەدى. بۇل كورسەتكىشتىڭ جوعارى ءمانى جوعارى قارىز جۇكتەمەسىن جانە تولەم قابىلەتسىزدىگى ىقتيمالدىعىنىڭ ارتۋىن كورسەتەدى. باستاما بانكتەردىڭ جاۋاپتى نەسيە ساياساتىن ىنتالاندىرۋعا، حالىقتىڭ شامادان تىس نەسيەلەنۋ ءقاۋپىن ازايتۋعا، قارجى جۇيەسىنىڭ تۇراقتىلىعىن نىعايتۋعا جانە نەسيەلەۋ قۇرىلىمىن تەڭگەرىمدى قالىپتاستىرۋعا باعىتتالعان.
ازىرگە قتق مونيتورينگتىك سيپاتقا يە – ازاماتتار ءۇشىن قاتاڭ شەكتەۋلەر بەلگىلەنبەگەن. دەگەنمەن، 21 جاسقا تولماعان قارىز الۋشىلار، اتاۋلى الەۋمەتتىك كومەك الۋشىلار جانە قۇمار ويىنعا تاۋەلدىلىك بەلگىلەرى بار كليەنتتەر جەكە تەكسەرىلەتىن بولادى. سونىمەن قاتار، قتق شەكتەۋلەرى نەسيەلەردىڭ بارلىق تۇرلەرىنە قولدانىلمايدى: ءبىلىم بەرۋ نەسيەلەرى، جەكەلەگەن يپوتەكالىق جانە اۆتوكولىك نەسيەلەرى ەرەكشەلىك بولىپ تابىلادى.