ەلىمىزدىڭ بانك سەكتورى اكتيۆتەرىنىڭ شامامەن 90%-ىن قۇرايتىن ءىرى بانكتەر 2027 جىلى تولىق اۋقىمدى قاداعالاۋ كيبەروقۋ-جاتتىعۋلارىنا تارتىلادى. بۇل تۋرالى قارجى نارىعىن رەتتەۋ جانە دامىتۋ اگەنتتىگى حابارلادى، دەپ جازادى infohub.kz.
اتالعان جوسپارلاردى «سيفرلىق سەنىمسىزدىك: جاساندى ينتەللەكت الاياقتار مەن قورعاۋشىلار ءۇشىن ويىن ەرەجەسىن قالاي وزگەرتەدى» پانەلدىك سەسسياسىندا اگەنتتىك ءتوراعاسىنىڭ ءبىرىنشى ورىنباسارى تيمۋر ءابىلقاسىموۆ ايتتى. ءىس-شارا استانادا KazHackStan 2026 حالىقارالىق كيبەرقاۋىپسىزدىك كونفەرەنسياسى اياسىندا ءوتتى.
بۇعان دەيىن اگەنتتىك پيلوتتىق قاداعالاۋ كيبەروقۋ-جاتتىعۋلارىن وتكىزگەن. تەكسەرۋ بارىسىندا بانك قۇرىلىمدارىنىڭ شابۋىلدارعا قارسى تۇرۋ، سونداي-اق ىقتيمال وقيعالاردان كەيىن اقپاراتتىق جۇيەلەردىڭ جۇمىسىن جەدەل قالپىنا كەلتىرۋ قابىلەتى باعالاندى.
ءابىلقاسىموۆتىڭ ايتۋىنشا، جاساندى ينتەللەكت كەڭ تاراعان جاعدايدا بانكتەردى قاداعالاۋ باعالاۋى ەكى نەگىزگى باعىتتى قامتيدى. ءبىرىنشىسى كورپوراتيۆتىك باسقارۋ سالاسىنا قاتىستى — بانكتەردىڭ رەسۋرستارى، بەيىندى كوماندالاردىڭ تولىقتىعى جانە ىشكى پروسەستەردى ۇيىمداستىرۋ جايى ءسوز بولادى. ەكىنشى باعىت تولىق اۋقىمدى كيبەروقۋ-جاتتىعۋلارىن وتكىزۋدى كوزدەيدى.
KazHackStan 2026 كونفەرەنسياسىن جاساندى ينتەللەكت جانە سيفرلىق دامۋ مينيسترلىگى كيبەرشابۋىلداردى تالداۋ جانە تەرگەۋ ورتالىعىمەن بىرلەسىپ ۇيىمداستىردى. كونفەرەنسيا جۇمىسىنا مەملەكەتتىك جانە قۇقىق قورعاۋ ورگاندارىنىڭ، قازاقستاندىق جانە حالىقارالىق CERT-كوماندالاردىڭ، بانكتەردىڭ، قارجى جانە تەحنولوگيالىق كومپانيالاردىڭ وكىلدەرى، سونداي-اق ازىرلەۋشىلەر، زەرتتەۋشىلەر مەن ساراپشىلار قاتىستى.
ءىس-شاراعا قاتىسۋشىلار جاساندى ينتەللەكتىنى قولدانۋدى، سيفرلىق تەحنولوگيالاردىڭ دامۋىن، كيبەرقاۋىپتەر مەن الاياقتىقتىڭ جاڭا تۇرلەرىن، سونداي-اق سيفرلىق ينفراقۇرىلىم مەن قارجى سەكتورىن قورعاۋ ادىستەرىن تالقىلادى.
بۇعان دەيىن «كۋرسيۆ» پرەزيدەنت قاسىم-جومارت توقايەۆ قاۋىپسىزدىك كەڭەسى مەن ونىڭ اپپاراتىنىڭ وكىلەتتىكتەرىن ناقتىلاعانىن جازعان. قاۋىپسىزدىك كەڭەسى ءتوراعاسىنىڭ ورىنباسارىنىڭ مىندەتتەرى قاتارىنا اقپاراتتىق جانە كيبەرقاۋىپسىزدىك، جاساندى ينتەللەكتىنى قولدانۋ جانە دەربەس دەرەكتەردى قورعاۋ ماسەلەلەرى ەنگىزىلدى.