بۇلتتار باسىپ جاسىرعان،
جانا ءتۇسىپ باسىلعان،
تاڭ شاپاعى ءسونىپ تۇر.
جاڭالانعان ومىردەن،
جاڭا شىعىپ كورىنگەن
گۇل قاماۋدا سەمىپ تۇر.
بالالىقتان باستالىپ،
(تاستايمىن از جاستى الىپ،
ەسىمە ناعىز ەنگەنشە)
كوردىم قىزىق، كورمەدىم؟
كورسەم، باعا بەرمەدىم
بوزبالا جاس كەلگەنشە.
قۇستاي تۇلكى الاتىن،
جايىپ التىن قاناتىن،
ۋىلجىعان وت لەپتى
جىگىتتىك جاس كەلدى دە،
ويدى ءبىراز ءبولدى دە،
تۇراعى جوق ول ءوتتى.
قۋدىم باقتى، ىزدەدىم،
«تابامىن عوي تەز» دەدىم،
ازاپ شەكتى ءتان-جانىم.
قاراپ جاقىن-جىراقتى،
جاقتىم ءتۇرلى شىراقتى،
تاپتىرمادى قۋعانىم.
ءۇمىت سۇيرەر جىراققا،
جەتەسىڭ دەپ مۇراتقا،
تالىقسام دا ىزدەنىپ.
قاشان كوڭىل جاراسار،
ارقا-باسىڭ بوسانار،
راقاتتى جاز كەلىپ؟
قاشان جانىپ شامشىراق،
ساۋلە بەرىپ جارقىراپ،
بولار جارىق ءتورت تاراپ؟
قاشان ماعان ىزدەگەن
كەلىپ جىلى جۇزبەنەن،
بولار سەرىك ب ا ق قاراپ؟!

---