استانالىق «بارىس» حوككەي كلۋبى ءوز تاربيەلەنۋشىلەرى — شابۋىلشىلار ابزال الىبەك پەن اسانالي ساركەنوۆپەن ءبىر جىلدىق كەلىسىمشارت جاساستى. ولار سوڭعى ەكى ماۋسىمدا سولتۇستىك امەريكا ليگالارىندا ونەر كورسەتكەن بولاتىن، دەپ حابارلايدى infohub.kz سايتى.
الىبەك وتكەن ماۋسىمدا 16-20 جاس ارالىعىنداعى ويىنشىلارعا ارنالعان سولتۇستىك امەريكا حوككەي ليگاسىندا (NAHL) «فيلادەلفيا رەبەلس» كلۋبى ساپىندا 46 كەزدەسۋدە 32 ۇپاي (12 گول + 30 پاس) جينادى. ساركەنوۆ ءدال وسى جاس ساناتىنداعى كانادانىڭ باتىس حوككەي ليگاسىندا (WHL) «سپوكان چيفس» ساپىندا ونەر كورسەتىپ، 46 ويىندا (پلەي-وففتى قوسقاندا) 14 (6+8) ۇپايمەن ەسەپتەلەدى.
«ءبىز ابزال مەن ءاساناليدىڭ انا جۇيەگە ورالعانىنا قۋانىشتىمىز»، — دەدى «بارىستىڭ» باس مەنەدجەرى لەونيد مەتالنيكوۆ. — قوسجاقتى كەلىسىمشارتتار (كونتينەنتالدى حوككەي ليگاسىندا «بارىس» ساپىندا جانە قازاقستان چەمپيوناتىندا «نوماد» ساپىندا ونەر كورسەتۋ مۇمكىندىگىن قاراستىرادى) ولارعا ءوزىن كورسەتۋگە، نەگىزگى قۇرامداعى ورىن ءۇشىن كۇرەسۋگە جانە ءبىزدىڭ رەزەرۆىمىزدىڭ تەرەڭدىگىن ارتتىرۋعا مۇمكىندىك بەرەدى. ولاردىڭ جاتتىقتىرۋشىلار شتابىنىڭ تالاپتارىنا تەز بەيىمدەلەتىنىنە ۇمىتتەنەمىز. ولاردان بارىنشا بەرىلگەندىك پەن پروگرەسس كۇتەمىز».
كەلىسىمشارتتار ءبىر ماۋسىمعا — 2027 جىلدىڭ 31 مامىرىنا دەيىن جاسالعان. بەيسەنبى، 17 شىلدەدە ەكى جاڭا ويىنشى كوماندانىڭ قوسجاقتى كەلىسىمشارتى بار جەتى باسقا ويىنشىسىمەن بىرگە العاشقى مۇزداعى جاتتىعۋىن وتكىزدى. تامىز ايىنىڭ باسىندا ولارعا نەگىزگى قۇرامنىڭ حوككەيشىلەرى قوسىلادى.
17 تامىزدا «بارىس» كحل-دىڭ ماۋسىم الدىنداعى ءتۋرنيرى — وفىدەگى «باشقۇرتستان رەسپۋبليكاسى كۋبوگىنىڭ» العاشقى ماچىن وتكىزەدى. وندا ونىڭ قارسىلاستارى جەرگىلىكتى «سالاۆات يۋلاەۆ»، سونداي-اق حاباروۆسكىنىڭ «امۋرى» جانە ءتولياتتيدىڭ «لاداسى» بولادى. 27 تامىزدا استانالىق كلۋب سانكت-پەتەربۋرگتەگى كسرو قۇراماسى مەن ارميا كلۋبىنىڭ قاقپاشىسى نيكولاي پۋچكوۆتى ەسكە الۋعا ارنالعان ەكىنشى ماۋسىم الدىنداعى تۋرنير اياسىندا جەرگىلىكتى سكا-مەن كەزدەسەدى. بۇل تۋرنير، باسقا دا ماۋسىم الدىنداعى تۋرنيرلەر سەكىلدى، اينالىمدىق جۇيە بويىنشا وتكىزىلەدى، مۇندا جەڭىمپاز ەڭ كوپ ۇپاي سانىمەن انىقتالادى. «بارىس» پەن سكا-دان بولەك، وعان پيتەرلىكتەردىڭ فارم-كلۋبى سكا-ۆمف جانە حاباروۆسكىنىڭ «امۋرى» قاتىسادى.
پۋچكوۆ ءتۋرنيرىنىڭ 2014 جىلى قايتا جاڭعىرۋىنان بەرى كوبىنەسە (سەگىز رەت) مۇز يەلەرى جەڭىسكە جەتتى، فيندىك «يوكەريت» ەكى مارتە، ومبىلىق «اۆانگارد» پەن ەكاتەرينبۋرگتىڭ «ءاۆتوموبيليسى» ءبىر رەتتەن جەڭدى. قازاقستاندىق كوماندانىڭ كحل-دىڭ 2026/27 ماۋسىمىنا دايىندىعىنىڭ سوڭعى كەزەڭى 31 تامىز بەن 6 قىركۇيەك ارالىعىندا «بارىس ارەنادا» وتەدى. «بارىستىڭ» كحل تۇراقتى ماۋسىمىنداعى العاشقى ماچى 7 قىركۇيەككە جوسپارلانعان: استانالىقتار ءۇي مۇزىندا ءنوۆوسىبىردىڭ «ءسىبىرىن» قابىلدايدى.