«بارىس» حوككەي كلۋبى كونتينەنتالدى حوككەي ليگاسىنىڭ (كحل) جاڭا ماۋسىمىندا كوماندانى باسقاراتىن باپكەرلىك شتابتى رەسمي تۇردە تانىستىردى، دەپ حابارلايدى infohub.kz.
باس باپكەر بولىپ رەسەيلىك مامان ميحايل كراۆەس قالادى، ول ەكىنشى ماۋسىمىن وتكىزەدى. ونىڭ كومەكشىسى رەتىندە قازاقستاندىق باپكەر تالعات جايلاۋوۆ جۇمىسىن جالعاستىرادى. جايلاۋوۆتىڭ جەتەكشىلىگىمەن قازاقستان ۇلتتىق قۇراماسى كوكتەمدە پولشادا وتكەن ءبىرىنشى ديۆيزيون تۋرنيرىندە الەم چەمپيوناتىنىڭ ەليتالىق ديۆيزيونىنا جولدامانى مەرزىمىنەن بۇرىن جەڭىپ العان بولاتىن. شابۋىلشىلارمەن جۇمىس ىستەۋگە الەكساندر ساۆچەنكوۆ، قورعاۋشىلاردى ەۆگەني كوروليەۆ، قاقپاشىلاردى كونستانتين بارۋلين جاتتىقتىرادى. جالپى دەنە دايىندىعى باپكەرلەرى بولىپ دەنيس ميحايليچەنكو مەن يگور ەليسەيەۆ، ۆيدەو-باپكەرلەر بولىپ سەرگەي تامبۋلوۆ پەن ۆلاديسلاۆ بەلان تاعايىندالدى.
ەسكە سالا كەتەيىك، 17 شىلدەدەن باستاپ «بارىس-ارەنا» مۇز ايدىنىندا ەكى جاقتى كەلىسىمشارتتارى بار ويىنشىلارعا ارنالعان جاتتىعۋلار باستالدى. ولار كحل-دا «بارىس» ءۇشىن دە، قازاقستان چەمپيوناتىندا ونىڭ فارم-كلۋبى «نوماد» ءۇشىن دە ونەر كورسەتە الادى. تامىز ايىنىڭ باسىندا ولارعا نەگىزگى قۇرامنىڭ ويىنشىلارى قوسىلادى.
«بارىس» العاشقى ماۋسىم الدىنداعى ماچىن 17 تامىزدا ۋفا قالاسىندا وتەتىن باشقۇرتستان رەسپۋبليكاسى كۋبوگىندا وتكىزەدى، وندا قارسىلاستارى جەرگىلىكتى «سالاۆات يۋلاەۆ»، حاباروۆتىق «امۋر» جانە تولياتتيلىك «لادا» بولادى. 20 شىلدەدە ءتۋرنيردىڭ تولىق كەستەسى بەلگىلى بولدى. ءبىرىنشى تۋردا (ءبىر اينالىمدا وتەدى) «بارىس» يەلەرىمەن 17 تامىزدا استانا ۋاقىتىمەن ساعات 19:00-دە كەزدەسەدى. 18 تامىزدا ساعات 15:00-دە «امۋرمەن»، 20 تامىزدا ساعات 13:00-دە «لادامەن» وينايدى. باشقۇرتستان رەسپۋبليكاسى كۋبوگى 1999 جىلدان بەرى ويناتىلىپ كەلەدى، ونى ەڭ كوپ «سالاۆات يۋلاەۆ» جەڭىپ العان (12 رەت)، ءۇش رەت ياروسلاۆلدىك «لوكوموتيۆ» جەڭىسكە جەتكەن. «بارىس» ءۇشىن بۇل ەكىنشى قاتىسۋ: 2018 جىلى كوماندا سوڭعى، ءتورتىنشى ورىن الدى.
27 تامىزدا استانالىق كلۋب سانكت-پەتەربۋرگتە سكا جانە كسرو قۇراماسىنىڭ قاقپاشىسى نيكولاي پۋچكوۆتى ەسكە الۋ تۋرنيرىندە ەكىنشى ماۋسىم الدىنداعى ءتۋرنيردى باستايدى. «بارىستىڭ» بۇل تۋرنيردەگى قارسىلاستارى (ءبىر اينالىم) سكا، ونىڭ فارم-كلۋبى سكا-ۆمف جانە حاباروۆتىق «امۋر» بولادى. جەڭىمپاز ەڭ كوپ ۇپاي سانى بويىنشا انىقتالادى.