استانالىق «بارىس» حوككەي كلۋبى كونتينەنتالدىك حوككەي ليگاسىنىڭ تۇراقتى چەمپيوناتىندا تومەنگى كامانىڭ «نەفتەحيميگىنە» قارسى ماچىن كەيىنگە شەگەرگەنىن حابارلادى. سەبەبى — ەلدە جاريالانعان ۇلتتىق ازا تۇتۋ، دەپ جازادى infohub.kz سايتى.
ءتيىستى شەشىمدى «بارىس» ءباسپاسوز قىزمەتى كلۋبتىڭ Instagram-داعى رەسمي پاراقشاسىندا جاريالادى. ويىن بۇگىن، 25 قىركۇيەكتە ءوتۋى ءتيىس ەدى، الايدا كوماندا باسشىلىعى ازا تۇتۋعا بايلانىستى ونى وتكىزبەۋگە شەشىم قابىلدادى.
ايتۋلارىنشا، ماچتى توقتاتۋ تۋرالى شەشىم بارلىق مۇددەلى تاراپتارمەن كەلىسىلگەن. كەزدەسۋدىڭ جاڭا مەرزىمى — 26 قىركۇيەك.
«كەزدەسۋ قازاقستان ۋاقىتىمەن 13:00-دە باستالادى. 25 قىركۇيەككە ساتىپ الىنعان بيلەتتەردىڭ بارلىعى ەرتەڭگى ماچقا جارامدى»، — دەپ ەسكەرتتى كلۋبتا.
سونىمەن قاتار جاستار كومانداسىنىڭ ماچى دا كەيىنگە شەگەرىلدى: «قار بارىستارى» «ءسىبىر سنايپەرلەرىمەن» ويناۋى ءتيىس ەدى. بۇل كەزدەسۋ دە 26 قىركۇيەكتە، ءبىراق 17:00-دە وتەدى. ساتىپ الىنعان بيلەتتەر كۇشىندە قالادى.
ەسكە سالايىق، 24 قىركۇيەكتە وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كەنەتتەن كۇرت ناشارلاۋى مەن ەكپىندى جەلدەن كاسپي تەڭىزىنە 17 اسكەري قىزمەتشى اعىزىلىپ كەتكەن بولاتىن. ۇشەۋى قۇتقارىلىپ، بىرەۋى اۋرۋحاناعا جات قىزىلدى. 12 ادامنىڭ قازا تاپقانى حابارلاندى، ەكى جوعالعان ادام ىزدەستىرىلدى. بۇگىن ولاردىڭ دەنەلەرى تابىلدى، وسىلايشا تراگەديا قۇرباندارىنىڭ جالپى سانى 14 ادامعا جەتتى.