الماتى، 11 ماۋسىم — قازاقستان مۇسىلماندارى ءدىني باسقارماسىنىڭ (قمدب) ءتوراعاسى، باس ءمۇفتي ناۋرىزباي قاجى تاعان ۇلىنىڭ ءانشى ساكەن مايعازيەۆتىڭ ۇلى ادىلەتتىڭ ۇيلەنۋ تويىنا قاتىسۋى جەلى قولدانۋشىلارى اراسىندا ءتۇرلى پىكىر تۋعىزدى. وسىعان بايلانىستى قمدب ءباسپاسوز حاتشىسى اعابەك قونارباي ۇلى الەۋمەتتىك جەلىدە رەسمي تۇسىنىكتەمە جاريالادى.
ول قمدب مەن باس ءمۇفتيدىڭ ەلدەگى قوعامدىق ماڭىزدى وقيعالاردان ەش ۋاقىتتا تىس قالمايتىنىن اتاپ ءوتتى.
"يمامدار ونسىز دا قايعىنىڭ بەل ورتاسىندا جۇرەدى. ءبىراق ونى ەشكىمگە مىندەتسىمەيدى. بەس ءبۇلدىرشىننىڭ قازاسىنا ءبارىمىزدىڭ ەت جۇرەگىمىز ەزىلدى. قوس اياعىنان ايىرىلعان قىزدىڭ تاعدىرىنا الاڭدادىق. يمامدار قوعام الدىنداعى مىندەتىن جاريالاماي-اق اتقارىپ كەلەدى"، – دەپ جازدى قونارباي ۇلى Facebook پاراقشاسىندا.
ونىڭ ايتۋىنشا، ءومىر تەك قارالى كۇندەرمەن شەكتەلمەيدى. سوندىقتان باس ءمۇفتيدىڭ تەك ازالى جيىندارعا عانا ەمەس، قۋانىشتى ساتتەرگە دە قاتىسىپ، باتا بەرۋى — ءدىن باسشىسىنا ءتان تابيعي ءىس.