اتىراۋ وبلىسىنىڭ بيۋدجەتتەن 88،8 ملن تەڭگەدەن استام قاراجات جىمقىرعان بۋحگالتەرى تۇرمەدە جەتى جىل وتىرادى — باس پروكۋراتۋرا زاڭسىز امنيستيانىڭ كۇشىن جويدى، دەپ حابارلايدى infohub.kz.
قىلمىس 2023–2024 جىلدارى جاسالعان. تەرگەۋ دەرەگىنشە، بۋحگالتەر مەملەكەتتىك مەكەمە باسشىسىمەن بىرىگىپ، بيۋدجەتتەن ونداعان ميلليون تەڭگەنى يەلەنگەن.
العاشىندا سوت ايەلدى جەتى جىلعا باس بوستاندىعىنان ايىرۋعا سوتتادى. الايدا كەيىن امنيستيا قولدانىلىپ، جازا مەرزىمى ءتورت جىل سەگىز ايعا قىسقارتىلدى.
تەكسەرۋ بارىسىندا باس پروكۋراتۋرا بۇل شەشىمنىڭ زاڭ بۇزۋشىلىقپەن قابىلدانعانىن انىقتادى. قولدانىستاعى زاڭناما بويىنشا، ەرەكشە ءىرى مولشەردە جىمقىرعانى ءۇشىن سوتتالعاندار امنيستياعا كەلتىرىلگەن زالالدى تولىق وتەگەن جاعدايدا عانا سەنە الادى.
بۇل جاعدايدا شارت ورىندالماعان. سوتتالعان ايەل ۇرلانعان سومانىڭ بارلىعىن قايتارماعان، ونىڭ ۇستىنە سوت ودان تاعى 36،8 ملن تەڭگەدەن استام وتەلمەگەن زالالدى ءوندىرۋدى شەشكەن.
وسىعان قاراماستان، ءبىرىنشى ساتىداعى سوت جازا مەرزىمىن ۇشتەن بىرگە قىسقارتتى، ال اپەللياسيالىق ساتى شەشىمدى وزگەرىسسىز قالدىردى.
«باس پروكۋراتۋرا كاسساسيالىق نارازىلىق ەنگىزدى. ناتيجەسىندە كاسساسيالىق سوت امنيستيانى قولدانۋدى جويىپ، باستاپقى ۇكىمدى — جەتى جىل باس بوستاندىعىنان ايىرۋدى قالپىنا كەلتىردى»، – دەپ ءتۇسىندىردى ۆەدومستۆونىڭ ءباسپاسوز قىزمەتى.
باس پروكۋراتۋرادا امنيستيا سوتتالعان ادام زاڭنىڭ مىندەتتى شارتىن — كەلتىرىلگەن زالالدى تولىق كولەمدە وتەمەگەن جاعدايدا قولدانىلمايتىنىن اتاپ ءوتتى.
بۇعان دەيىن قاراعاندى وبلىسىندا سوت قاتەلىكپەن قايتالاپ الاياقتىق جاساعان ايەلدى امنيستيالاعانى حابارلانعان بولاتىن.
كەشە قازاقستاندا پرەزيدەنت قاسىم-جومارت توقاەۆتىڭ باستاماسىمەن وتكەن ەل تاۋەلسىزدىگى تاريحىنداعى العاشقى اكىمشىلىك امنيستيانىڭ قورىتىندىسى شىعارىلدى. باس پروكۋرور بەرىك اسىلوۆتىڭ مالىمەتىنشە، بار بولعانى ءبىر ايدىڭ ىشىندە مەملەكەت 1،3 ملن ءىس بويىنشا 681،7 مىڭ ازاماتتى اكىمشىلىك جازادان تولىق بوساتقان. ەسەپتەن شىعارىلعان ايىپپۇلداردىڭ جالپى سوماسى 22،8 ملرد تەڭگەنى قۇرادى.