قازاقستاندا ەڭ اۋىر قۇقىق بۇزۋشىلىقتاردان زارداپ شەككەن ازاماتتار زارداپ شەككەندەرگە وتەماقى تولەۋ قورىنان العاشقى مەملەكەتتىك قارجىلىق قولداۋ الا الادى. تولەم مولشەرى 30-دان 50 ايلىق ەسەپتىك كورسەتكىشكە دەيىن، دەپ حابارلايدى infohub.kz سايتى.
باس پروكۋراتۋرانىڭ ءباسپاسوز قىزمەتى تۇسىندىرگەندەي، ەلدە «زارداپ شەككەندەرگە وتەماقى تولەۋ قورى تۋرالى» زاڭ قولدانىستا. ول ەڭ اۋىر قۇقىق بۇزۋشىلىقتاردان زارداپ شەككەن ازاماتتارعا العاشقى مەملەكەتتىك قارجىلىق قولداۋ كورسەتۋگە باعىتتالعان.
«بۇل تولەم — مەملەكەت تاراپىنان بەرىلەتىن ماتەريالدىق كومەك. ول كىنالىنىڭ انىقتالعانىنا، جاۋاپكەرشىلىككە تارتىلعانىنا جانە زياندى وتەگەنىنە قاراماستان تولەنەدى»، — دەپ اتاپ ءوتتى قاداعالاۋ ورگانىندا.
زاڭنامادا اقشالاي قاراجات الۋعا قۇقىعى بار ازاماتتار ساناتتارى ناقتى بەلگىلەنگەن. ولاردىڭ قاتارىندا جىنىستىق زورلىق-زومبىلىق قۇرباندارى بولعان كامەلەتكە تولماعاندار؛ ادام ساۋداسى مەن ازاپتاۋ قۇرباندارى؛ دەنساۋلىعىنا اۋىر زيان كەلتىرىلگەن ادامدار، سونداي-اق قىلمىس سالدارىنان ايتۆ/جيتس جۇقتىرعاندار بار. سونىمەن قاتار، زارداپ شەككەن ادام قايتىس بولعان جاعدايدا ونىڭ زاڭدى وكىلدەرى، ياعني جاقىن تۋىستارى تولەم الۋعا قۇقىلى. ءتيىستى باپتاردىڭ تىزبەسى زاڭدا كورسەتىلگەن.
تولەم ءبىرجولعى بولىپ تابىلادى، ونىڭ مولشەرى ايلىق ەسەپتىك كورسەتكىش نەگىزىندە ەسەپتەلەدى جانە قىلمىس ساناتىنا قاراي 30-دان 50 اەك-كە دەيىن قۇرايدى. ءوتىنىش بەرۋ مەرزىمى ادامدى زارداپ شەككەن دەپ تانىعان كۇننەن باستاپ ءۇش جىل.
«قىلمىستىق قۋدالاۋ ورگانى ادامدى زارداپ شەككەن دەپ تانۋ تۋرالى قاۋلى شىعارعان كەزدە وعان قوردان وتەماقى الۋ قۇقىعى مەن ءوتىنىش بەرۋ ءتارتىبىن جازباشا تۇسىندىرۋگە مىندەتتى. بانكتىك شوتىن كورسەتىپ، ءوتىنىشتى ءىستى جۇرگىزىپ وتىرعان تەرگەۋشىگە بەرۋگە بولادى. تولەم ءىس جۇرگىزۋ قۇجاتتارىنىڭ پاكەتى قالىپتاسقاننان كەيىن قازىناشىلىق تاراپىنان قولما-قول اقشاسىز تارتىپپەن جۇزەگە اسىرىلادى»، — دەپ ءتۇسىندىردى باس پروكۋراتۋرادا.
قاداعالاۋ ورگانى بۇل قارجىلىق كومەكتى الۋ ازاماتتى كىنالى ادامنان ماتەريالدىق جانە مورالدىق زياندى تولىق وتەۋدى سوت تارتىبىمەن تالاپ ەتۋ قۇقىعىنان ايىرمايتىنىن قوستى.