2024 جىلى پەنسيلۆانيا شتاتىنىڭ باتلەر قالاسىندا وتكەن دونالد ترامپتىڭ سايلاۋالدى ميتينگىسىندە وق تيگەن دجيم كوپەنحاۆەر قايتىس بولدى، دەپ حابارلايدى infohub.kz سايتى.
ترامپ ءوزىنىڭ Truth Social الەۋمەتتىك جەلىسىندەگى جازباسىندا كوپەنحاۆەردى «ناعىز امەريكاندىق پاتريوت» دەپ اتادى. «ەكى جىلدان استام ۋاقىت بۇرىن پەنسيلۆانيانىڭ باتلەر قالاسىندا جىندى قارۋلى ادام ءبىزدىڭ «امەريكا ءبىرىنشى» قوزعالىسىمىزدى باسىپ-جانشۋعا ارەكەتتەندى. الايدا دجيم مەن ەلىمىزدى سۇيەتىن تاعى دا كوپتەگەن كەرەمەت پاتريوتتار بوستاندىق، ەركىندىك جانە ادىلەت دەگەن ورتاق قۇندىلىقتارىمىزدى قورعاۋدا بىرلىك تانىتتى»، — دەدى ترامپ. «جۇرەگىمىز بەن دۇعامىز كوپەنحاۆەر وتباسىمەن، اسىرەسە ونىڭ كەرەمەت جۇبايى مەريانمەن بىرگە».
كوپەنحاۆەر وتباسىنىڭ ادۆوكاتى ونىڭ اقش-قا دەگەن ادالدىعى «ءومىرىنىڭ ايقىنداۋشى بولىگى» بولعانىن ايتتى. «ارداگەر رەتىندە ول قارۋلى كۇشتەر قاتارىندا ەلىمىزگە ادال قىزمەت ەتتى، وتانىنا دەگەن سۇيىسپەنشىلىگى ەشقاشان سەلقوستانعان ەمەس»، — دەدى زاڭگەر ءبي-بي-سيدىڭ امەريكالىق سەرىكتەسى سي-بي-ەس ءنيۋستىڭ حابارلاۋىنشا.
باتلەردەگى ميتينگىدەن ءبىر جىل وتكەن سوڭ سي-بي-ەس نيۋسكە بەرگەن سۇحباتىندا كوپەنحاۆەر مەن وق تيگەن ءۇشىنشى قاتىسۋشى دەۆيد داچ جاراقاتتان كەيىن ينفەكسيالار مەن وتالاردى باستان وتكەرگەندەرىن ايتقان. كوپەنحاۆەر قولى مەن ىشىنەن جارالانعان. ءبىر جىلدان كەيىن وق ونىڭ دەنەسىندە ومىرتقاسىنىڭ قاسىندا قالىپ قويعانىن، سول سەبەپتى تاياقپەن جۇرەتىنىن ول سي-بي-ەس نيۋسكە ايتقان.
داچ پەن كوپەنحاۆەر ماۋسىم ايىندا فەدەرالدىق ۇكىمەتكە ولاردىڭ قاۋىپسىزدىگىن قامتاماسىز ەتە الماعانى ءۇشىن زالال وتەماقىسىن تالاپ ەتىپ سوتقا جۇگىنگەن. ولاردىڭ پايىمداۋىنشا، قۇپيا قىزمەت ولاردىڭ قاۋىپسىزدىگىن قامتاماسىز ەتە الماعاندىقتان، جاراقاتتارى ءۇشىن جاۋاپتى.
اقش وكىلدەر پالاتاسىنداعى رەسپۋبليكاشىلدار دا جۇما كۇنى كوپەنحاۆەرگە قۇرمەت كورسەتىپ، الەۋمەتتىك جەلىدەگى جازباسىندا: «دجيم توزگىسىز قيىندىقتى كۇش-جىگەر مەن تاباندىلىقپەن باستان وتكەردى»، — دەپ جازدى.