الداعى كۇندەرى قازاقستاننىڭ بارلىق دەرلىك ايماعىندا جاڭبىر كۇتىلەدى، ءبىراق ەلدىڭ باتىس وڭىرلەرىنە +44 گرادۋسقا دەيىنگى وتە كۇشتى اپتاپ قايتا ورالادى، دەپ infohub.kz سايتى حابارلايدى.
سينوپتيكتەر 23-25 شىلدە ارالىعىنا اۋا رايى بولجامىن ۇسىندى. سولتۇستىك-باتىس سيكلونى قازاقستان اۋماعى ارقىلى ءوتىپ، نايزاعايلى جاڭبىر اكەلەدى، كەيبىر اۋدانداردا قاتتى نوسەر جاۋۋى مۇمكىن، ەلدىڭ كوپ بولىگىندە بۇرشاق ءتۇسۋى ىقتيمال.
سالقىن اۋا ماسسالارىمەن قورەكتەنەتىن سيكلون تەمپەراتۋرانىڭ تومەندەۋىنە اكەلەدى. الايدا باتىس وڭىرلەرگە يران ايماقتارىنان جىلى جانە قۇرعاق اۋا ماسسالارى كەلە باستايدى.
«قازگيدرومەتتىڭ» دەرەگىنشە، بۇل جاۋىن-شاشىننىڭ توقتاپ، تەمپەراتۋرانىڭ كوتەرىلۋىنە الىپ كەلەدى: كۇندىز كۇشتى ىستىق +34…+39 گرادۋس، كەيبىر اۋدانداردا وتە كۇشتى ىستىق +40…+44 گرادۋس كۇتىلەدى.