بۇۇ باسشىسى انتونيۋ گۋتەرريش باشار اساد رەجيمى قۇلاعاننان كەيىن سيرياعا العاش رەت باردى. ساپار بارىسىندا ول حالىقارالىق قاۋىمداستىقتى ەلدى قالپىنا كەلتىرۋگە كومەكتەسۋگە شاقىرىپ، گولان بيىكتەرىنىڭ سيريالىقتارعا تيەسىلى ەكەنىن راستادى، دەپ حابارلايدى infohub.kz.
بۇۇ ءباسپاسوز قىزمەتىنىڭ مالىمدەمەسىندە گۋتەرريش سيريانى «تاياۋ شىعىستاعى تۇراقتىلىقتىڭ تىرەگى» دەپ اتاپ، ەل «جاڭا مۇمكىندىكتەردىڭ تابالدىرىعىندا تۇرعانىن» ايتتى. ول كوپجىلدىق قاقتىعىستان زارداپ شەككەن مەملەكەتكە كومەك كورسەتۋ ءۇشىن وسى ءساتتى پايدالانۋعا شاقىردى.
بۇۇ باس حاتشىسى 2011 جىلى سيريا حالقىنا قارسى قۋعىن-سۇرگىن باستالعاننان باستاپ رەجيم قۇلاعانعا دەيىن سيرياعا ادەيى بارماعانىن اتاپ ءوتتى. «بۇگىن سيريا جاڭا مۇمكىندىكتەردىڭ تابالدىرىعىندا. ەندى ونىڭ قاقتىعىستان ايىعىپ قانا قويماي، تۇراقتى، ينكليۋزيۆتى جانە گۇلدەنگەن بولاشاقتىڭ ىرگەتاسىن قالاۋعا مۇمكىندىگى بار»، — دەدى ول.
گۋتەرريش ون جىلدان استام قاقتىعىستى باستان وتكەرگەن ەشبىر ەلدىڭ جالعىز ءوزى قالپىنا كەلمەيتىنىن ايتىپ، بەلسەندى حالىقارالىق قولداۋعا شاقىردى. ول حالىقارالىق قاۋىمداستىق «ەلدىڭ ەكونوميكاسى مەن ينفراقۇرىلىمىن قالپىنا كەلتىرۋگە، نەگىزگى قىزمەتتەردى قايتا ىسكە قوسۋعا، جۇمىسپەن قامتۋ مۇمكىندىكتەرىن كەڭەيتۋگە، سونداي-اق بوسقىندار مەن قونىس اۋدارعان ادامداردىڭ ورالۋىنا جاعداي جاساۋعا كومەكتەسۋى كەرەك» دەپ مالىمدەدى.
بۇۇ باس حاتشىسى ۇيىمنىڭ سيريانىڭ ەگەمەندىگى، تاۋەلسىزدىگى جانە اۋماقتىق تۇتاستىعىن قولدايتىنىن اتاپ ءوتتى. «سيريانىڭ ەگەمەندىگى مەن اۋماقتىق تۇتاستىعىنا قول سۇعۋعا بولمايدى جانە ونى توقتاتۋ كەرەك. گولان بيىكتەرى ماڭىنداعى ايماقتا بولىپ جاتقان جاعداي مۇلدەم قولايسىز. مەن حالىقارالىق قاۋىمداستىققا گولان بيىكتەرىنىڭ سيريا اۋماعى ەكەنىن ەسكە سالعىم كەلەدى. سيرياعا تيەسىلى نارسە سيرياعا تيەسىلى جانە ونى تارتىپ الۋ مۇمكىن ەمەس»، — دەپ قوستى ول.
Euronews مالىمەتىنشە، گۋتەرريش الەم ەلدەرىن سيرياعا قارسى بارلىق سانكسيالاردى الىپ تاستاۋعا شاقىردى. «مەن سانكسيالاردى جەڭىلدەتۋ جانە ەكونوميكالىق قالپىنا كەلتىرۋ ءۇشىن جاڭا مۇمكىندىكتەر اشۋ باعىتىنداعى قادامداردى قۇپتايمىن. ءبىراق بۇل سانكسيالاردىڭ ءبارى دەرەۋ جويىلۋى كەرەك»، — دەدى ول داماسكىدەگى ءباسپاسوز ءماسليحاتىندا.