بانك سەنتركرەديت (بسك) 6،8 ملن جاي اكسياسىن جالپى سوماسى 30 ملرد تەڭگەگە ساتىپ الۋ نيەتىن جاريالادى. بۇل رەتتە ساتىپ الۋ باعاسى قازىرگى بيرجالىق باعامنان تومەن بەلگىلەنگەن، دەپ حابارلايدى infohub.kz سايتى.
قارجىلىق ەسەپتىلىك دەپوزيتاريىنىڭ (DFO) سايتىندا جاريالانعان قۇجاتقا سايكەس، بانك 6 819 732 باعالى قاعازدى (ISIN KZ0007786572) داناسىن 4 399 تەڭگەدەن ساتىپ الۋدى جوسپارلاپ وتىر. مامىلەلەر قازاقستان قور بيرجاسىنىڭ (KASE) ۇيىمداستىرىلعان نارىعىندا قولما-قول اقشاسىز نىساندا 2026 جىلدىڭ 10 قىركۇيەگى مەن 31 جەلتوقسانى ارالىعىندا جۇزەگە اسىرىلادى.
ۇسىنىلعان باعا نارىقتىق باعادان تومەن بولىپ شىقتى: حابارلاما جاريالانعان 2 قىركۇيەكتەگى ساۋدادا بسك اكسيالارى داناسىنا 4 780 تەڭگەدەن ساتىلدى. وسىلايشا، ديسكونت ءبىر قاعازعا 381 تەڭگەنى نەمەسە شامامەن 8% قۇرادى. ەگەر بانك پاكەتتى نارىقتىق باعامەن ساتىپ العاندا، مامىلە 32،6 ملرد تەڭگەگە، ياعني 2،6 ملرد تەڭگەگە قىمباتقا تۇسەر ەدى.
ساتىپ الۋعا جۇمسالاتىن جالپى 30 ملرد تەڭگە شىعىن بسك-نىڭ 2025 جىلعى تازا پايداسىنىڭ 11،2%-ىنا تەڭ، ول 268،3 ملرد تەڭگەنى قۇرادى. بانك اينالىمداعى بارلىق اكسيالاردىڭ (176 080 651 دانا) شامامەن 3،9%-ىن نارىقتان الىپ كەتەدى. قازىرگى ۋاقىتتا 188 ملن ورنالاستىرىلعان قاعازدىڭ 11،9 ملن داناسىن قارجى ينستيتۋتى ساتىپ العان، سوندىقتان جاڭا باعدارلاما اياقتالعاننان كەيىن ساتىپ الىنعان پاكەت كولەمى ءبىر جارىم ەسەدەن استامعا ارتادى.
بانك سەنتركرەديتتىڭ ءىرى اكسيونەرلەرى — جاي اكسيالاردىڭ 51،76%-ىمەن باحىتبەك بايسەيىتوۆ جانە 11،92%-ىمەن ۆلاديسلاۆ لي. بايسەيىتوۆ Forbes نۇسقاسى بويىنشا قازاقستاننىڭ ەڭ باي بيزنەسمەندەرى تىزىمىندە 858 ملن دوللار كۇيىمەن 13-ورىندا، ال لي 197 ملن دوللار كاپيتالىمەن 52-ساتىدا تۇر.
بۇعان دەيىن «كۋرسيۆ» بسك 2025 جىلى تريلليون تەڭگەنىڭ تورتتەن بىرىنەن استامىن تاپقانىن جازعان بولاتىن.