سەم مەندەس تۇسىرەتىن Beatles تۋرالى ءتورت ءفيلمنىڭ پروديۋسەرلىك توبى لوندونداعى Abbey Road ستۋدياسىنىڭ الدىندا اتى اڭىزعا اينالعان Abbey Road البومىنىڭ مۇقاباسىن قايتا جاڭعىرتىپ جاتقانى بايقالدى. بۇل تۋرالى infohub.kz حابارلادى.
الەۋمەتتىك جەلىدە جەكسەنبى كۇنى جاريالانعان ۆيدەودا Beatles ءرولىن سومداعان اكتەرلەردىڭ جول جيەگىندە ءتىزىلىپ، جولدىڭ ارعى بەتىنە ءوتىپ بارا جاتقانى كورىنەدى. دجون لەننوندى سومداعان حارريس ديكينسون باستاپ كەلەدى، ال رينگو ستارردى سومداعان بارري كەوگان، پول ماككارتنيدى سومداعان پول مەسكال جانە دجوردج حارريسوندى سومداعان دجوزەف كۋينن ونىڭ ارتىنان ىلەسەدى.
Beatles توبى Abbey Road البومىن نەگىزىنەن 1969 جىلدىڭ جازىندا جازعان، ال مۇقابا فوتوسۋرەتى 8 تامىزدا تۇسىرىلگەن. بۇعان دەيىن نەپالعا بارىپ سۋرەتكە ءتۇسۋ يدەياسى بولعان، ءبىراق ول جۇزەگە اسپاعان. (البومنىڭ جۇمىس اتاۋى Everest بولعان — ينجەنەر دجەفف ەمەريك شەگەتىن سول كەزدەگى تانىمال تەمەكى برەندىنە بايلانىستى.) فوتوسۋرەتتى تاۋەلسىز فوتوگراف يەن ماكميللان تۇسىرگەن. ول جولدىڭ ورتاسىنا باسپالداق قويىپ، التى كادر تۇسىرگەن — سولاردىڭ ءبىرى تاڭدالعان.
مەندەس بۇل جوبانى 2024 جىلدىڭ اقپانىندا جاريالاعان — ءارقايسىسى جەكە Beatles مۇشەسىنە ارنالعان ءتورت فيلم. جوبانى گولليۆۋدتىڭ Sony Pictures ستۋدياسى قولداعان، ال ماككارتني مەن ستارردىڭ كەلىسىمى، سونداي-اق لەننون مەن حارريسوننىڭ مۇراگەرلەرىنىڭ رۇقساتى الىنعان. باستى رولدەردى سومداعان اكتەرلەردەن بولەك، كاستقا تاعى دا اتاقتى ەسىمدەر قوسىلعان: ليندا ماككارتني رولىندە سيرشا رونان، برايان ەپشتەين رولىندە دجەيمس نورتون، دجەين ەشەر رولىندە ليۋسي بوينتون.
فيلمدەر 2028 جىلدىڭ ساۋىرىندە شىعادى دەپ جوسپارلانۋدا.