قازاقستانداعى Beeline وپەراتورىن يەلەنەتىن «كار-تەل» كومپانياسى ءبىرىنشى ساناتتاعى تولەم ۇيىمىنىڭ ليسەنزياسىن الۋعا نيەتتى. بۇل مارتەبە وعان زاڭدى تۇلعالاردىڭ شوتتارىن اشۋعا، تولەم كارتالارىن شىعارۋعا جانە بانكارالىق تولەمدەر جۇيەسىنە قوسىلۋعا جول اشادى، دەپ حابارلايدى infohub.kz سايتى.
تولەم قىزمەتتەرى مەن تولەم ينفراقۇرىلىمىن دامىتۋعا باعىتتالعان ءتيىستى ىنتىماقتاستىق مەموراندۋمى Central Asia Fintech Summit 2026 الاڭىندا جاسالدى. قۇجاتقا ۇلتتىق بانك، حالىقارالىق VEON كومپانياسى جانە VEON توبىنا كىرەتىن «كار-تەل» قول قويدى.
كەلىسىم بويىنشا VEON حولدينگىنىڭ كومپانيالارى ءبىرىنشى ساناتتاعى تولەم ۇيىمىنىڭ ليسەنزيالارىن الادى. سونىمەن قاتار تاراپتار تولەم قىزمەتتەرىن جەتىلدىرۋ جانە زاماناۋي سيفرلىق تولەم سەرۆيستەرىن ەنگىزۋ جونىندە بىرلەسىپ جۇمىس ىستەۋدى جوسپارلاپ وتىر.
ۇلتتىق بانك ءتوراعاسىنىڭ ورىنباسارى بينۇر جالەنوۆ بۇعان دەيىن تۇسىندىرگەندەي، تولەم ۇيىمىنىڭ ليسەنزياسى دەپوزيت اشۋ مەن نەسيە بەرۋدەن باسقا، بانكتىك قىزمەتتەردىڭ بارلىق ءتۇرىن كورسەتۋگە قۇقىق بەرەدى. تولەم ۇيىمى جەكە جانە زاڭدى تۇلعالاردىڭ شوتتارىن اشىپ، كارتا شىعارا الادى جانە ءبىرىڭعاي QR-كود ارقىلى تولەمدەر جۇرگىزە الادى.
VEON توبىنا كىرەتىن «كار-تەل» قازاقستاندا Beeline برەندىمەن ۇيالى بايلانىس وپەراتورى رەتىندە جۇمىس ىستەيدى. كومپانيا ءوزىنىڭ تولەم سەرۆيسىن دە دامىتىپ كەلەدى: 2021 جىلى Simply ءموبيلدى نەوبانكى ىسكە قوسىلعان. ونىڭ قوسىمشاسىندا ۆيرتۋالدى كارتا اشىپ، ءتۇرلى تولەم مەن اۋدارىم جاساۋعا بولادى.
بۇعان دەيىن VEON باس ديرەكتورى كاان تەرزيوگلۋ كومپانيا قازاقستاندىق Kaspi.kz فينتەح-كومپانياسىمەن، سونداي-اق Yandex برەندىمەن جۇمىس ىستەيتىن جەرگىلىكتى تاكسي سەرۆيستەرىمەن باسەكەلەسۋگە نيەتتى ەكەنىن مالىمدەگەن.