Beeline قازاقستان، الەمدىك سيفرلىق وپەراتور VEON جانە قازاقستان ۇلتتىق بانكى تولەم قىزمەتتەرى سالاسىنداعى ىنتىماقتاستىق تۋرالى مەموراندۋمعا قول قويدى. قۇجات بەس جىلعا ارنالعان جانە تاراپتاردىڭ تولەم قىزمەتتەرى سالاسىنداعى نەگىزگى ىنتىماقتاستىق باعىتتارىن، سونداي-اق سيفرلىق سەرۆيستەردى قازاقستاننىڭ ۇلتتىق تولەم جانە سيفرلىق قارجى ينفراقۇرىلىمىمەن ينتەگراسيالاۋ مۇمكىندىكتەرىن زەردەلەۋدى ايقىندايدى، دەپ حابارلايدى infohub.kz سايتى.
ىنتىماقتاستىق باعىتتارىنىڭ ءبىرى — Beeline-نىڭ ەلدىڭ تولەم نارىعىنداعى قاتىسۋشى رەتىندەگى ودان ءارى دامۋى. كومپانيا ءبىرىنشى ساناتتاعى تولەم ۇيىمى مارتەبەسىن العان نارىقتىڭ العاشقى قاتىسۋشىلارىنىڭ قاتارىنا كىرۋدى كوزدەپ وتىر. مۇنداي مارتەبە الۋ قازاقستاندا تولەم سەرۆيستەرىن دامىتۋعا قوسىمشا مۇمكىندىكتەر تۋعىزادى.
مەموراندۋم الماتىدا وتكەن Central Asia Fintech Summit اياسىندا جاسالدى. بۇل — قازاقستان ۇلتتىق بانكى، ۇلتتىق تولەم كورپوراسياسى جانە Kazakhstan Fintech Network ۇيىمداستىرعان ايماقتىڭ قارجى-تەحنولوگيالىق سەكتورىنداعى نەگىزگى ءىس-شارالاردىڭ ءبىرى.
«قازاقستان زاماناۋي ۇلتتىق تولەم ينفراقۇرىلىمىن دايەكتى تۇردە دامىتىپ كەلەدى، ءبىز ءۇشىن وسى ترانسفورماسيانىڭ ءبىر بولىگى بولۋ ماڭىزدى. Beeline كومپانيالار توبى تولەم سەرۆيستەرىندە ايتارلىقتاي تاجىريبەگە يە، ال VEON — حالىقارالىق تەحنولوگيالىق تاجىريبە مەن اۋقىمدى سيفرلىق ەكوسيستەماعا. وسى مۇمكىندىكتەردى ۇلتتىق تولەم ينفراقۇرىلىمىمەن بىرىكتىرۋ ميلليونداعان پايدالانۋشى ءۇشىن جاڭا، قولايلى ءارى قولجەتىمدى قارجى سەرۆيستەرىن جاساۋعا جول اشادى. ءبىزدىڭ مىندەتىمىز — تولەمدەر مەن اۋدارىمداردى كليەنتتىڭ كۇندەلىكتى سيفرلىق تاجىريبەسىنىڭ تابيعي بولىگىنە اينالدىرۋ: قاراپايىم، جىلدام جانە ءقاۋىپسىز»، — دەدى Beeline قازاقستان حولدينگىنىڭ باس ديرەكتورى دجاببور كايۋموۆ.
ىنتىماقتاستىقتىڭ تاعى ءبىر باعىتى — VEON توبىنىڭ كومپانيالارىنىڭ ۇلتتىق تولەم كورپوراسياسىنىڭ جەكەلەگەن سەرۆيستەرى مەن ينفراقۇرىلىمدىق شەشىمدەرىن پايدالانۋ مۇمكىندىكتەرىن زەردەلەۋ. بۇل تولەمدەر مەن اقشا اۋدارىمدارىن جۇرگىزۋ قۇرالدارىن، سونداي-اق قارجى نارىعى قاتىسۋشىلارىنىڭ ءوزارا ءىس-قيمىلى مەن ەسەپ ايىرىسۋ شەشىمدەرىن قامتۋى مۇمكىن.
ىنتىماقتاستىق تاراپتارعا VEON-نىڭ سيفرلىق ەكوسيستەماسىندا قازاقستاننىڭ ۇلتتىق تولەم ينفراقۇرىلىمى مەن توپتىڭ حالىقارالىق تاجىريبەسىن پايدالانا وتىرىپ، جاڭا قارجى سەرۆيستەرىن جاساۋ مۇمكىندىكتەرىن زەردەلەۋگە مۇمكىندىك بەرەدى. بۇل رەتتە ءاربىر جوبا جەكە رەگۋلياتورلىق، زاڭدىق جانە تەحنيكالىق ساراپتامادان ءوتىپ، بارلىق قاجەتتى تالاپتار مەن راسىمدەر ورىندالعاننان كەيىن جۇزەگە اسىرىلاتىن بولادى.
VEON — 150 ملن-نان استام بايلانىس قىزمەتى كليەنتى مەن 228 ملن-نان استام سيفرلىق پلاتفورما پايدالانۋشىسىنا قىزمەت كورسەتەتىن سيفرلىق وپەراتور. كومپانيا الەم حالقىنىڭ 6%-دان استامى تۇراتىن 5 ەلدە جۇمىس ىستەيدى جانە ادامدارعا كومەكتەسىپ، ەكونوميكالىق وسۋگە ىقپال ەتەتىن تەحنولوگيالىق سەرۆيستەردى دامىتادى. كومپانيا قازاقستاندا تەلەكوممۋنيكاسيالىق، قارجى، سيفرلىق جانە تەحنولوگيالىق سەرۆيستەردى دامىتاتىن Beeline سيفرلىق وپەراتورى ارقىلى ۇسىنىلعان.