قازاقستاننىڭ ۇلتتىق قاۋىپسىزدىك كوميتەتى Bek Air اۋەكومپانياسىنىڭ ناقتى يەسى نۇرلان جۇماسۇلتانوۆقا قاتىستى قىلمىستىق ءىستى تەرگەپ جاتىر. ول اسا ءىرى مولشەردە اۆياسيالىق قوزعالتقىشتاردى ۇرلادى دەپ كۇدىككە ىلىنگەن. تونالعان اگرەگاتتاردىڭ بىرەۋى كەيىن تاسىمالداۋشىنىڭ ۇشاعىنا ورناتىلعان، دەپ حابارلايدى infohub.kz سايتى.
ءىستىڭ ءمان-جايىن جۋرناليست ميحايل كوزاچكوۆ ءوزىنىڭ Telegram-ارناسىندا جاريالادى. ونىڭ مالىمەتىنشە، جۇماسۇلتانوۆ ۇستالىپ، 9 قىركۇيەكتە الماتىنىڭ تەرگەۋ سوتى ونى ەكى ايعا قاماۋعا الۋعا سانكسيا بەرگەن.
«اپاتقا ۇشىراعان «فوككەر-100» ۇشاعىندا ۇرلانعان قوزعالتقىشتاردىڭ بىرەۋى تۇرعان — ونى ءنومىرى بويىنشا انىقتادى. ياعني، بىرەۋ اۋىر اگرەگاتتى كونسەرۆاسيالانعان ۇشاقتان الىپ، ونى Bek Air-گە تيەسىلى لاينەرگە اۋىستىرىپ قويعان. ءبىراق مۇنى كىم ىستەگەن بولۋى مۇمكىن؟ بۇل سۇراققا جاۋاپتى كولىكتەگى پوليسيا دەپارتامەنتىنىڭ قىزمەتكەرلەرى بىرنەشە جىل بويى ىزدەستىردى، ونىڭ ىشىندە شەتەلگە دە حالىقارالىق تاپسىرمالار جىبەردى»، — دەپ جازدى كوزاچكوۆ.
ءجۋرناليستىڭ دەرەگىنشە، بيىلعى جىلى باس كولىك پروكۋراتۋراسى بۇل ءىس بويىنشا ءىس جۇرگىزۋدى ۇلتتىق قاۋىپسىزدىك كوميتەتىنە بەرگەن.
«ال ۇقك-دە اقىرى كۇردەلى رەبۋستى شەشۋگە قول جەتكىزدى. ولار ۇرلانعان قوزعالتقىشتاردىڭ بىرەۋى Bek Air ۇشاعىندا تۇرعاندىقتان، بۇعان اۋەكومپانيانىڭ يەلەرى نەمەسە باسشىلارى قاتىستى بولۋى مۇمكىن دەگەن قورىتىندىعا كەلدى»، — دەدى كوزاچكوۆ.
وسىدان كەيىن نۇرلان جۇماسۇلتانوۆتى جاۋاپ الۋعا شاقىرىپ، كۇدىكتى دەپ تانىپ، ۇستاعان. كوزاچكوۆتىڭ مالىمەتىنشە، ءىستىڭ تاعى ءبىر فيگۋرانتى ءۇيقاماققا الىنعان.
جۇماسۇلتانوۆقا قىلمىستىق كودەكستىڭ 188-بابىنىڭ 4-بولىگى — اسا ءىرى مولشەردە ۇرلىق جاساۋ ايىپتالىپ وتىر. باپتىڭ سانكسياسى مۇلكى تاركىلەنىپ، بەس جىلدان 10 جىلعا دەيىن باس بوستاندىعىنان ايىرۋدى كوزدەيدى.
باس كولىك پروكۋراتۋراسى «كۋرسيۆكە» ءىستى ۇقك-نىڭ ورتالىق اپپاراتى تەرگەپ جاتقانىن، قاداعالاۋدى بكپ جۇزەگە اسىراتىنىن راستادى.
«ءىستى ۇقك-نىڭ ورتالىق اپپاراتى تەرگەپ جاتىر، قاداعالاۋدى بكپ جۇرگىزەدى»، — دەلىنگەن ۆەدومستۆو حابارلاماسىندا.
پروكۋراتۋرا قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە اقپاراتتى جاريالامادى.