قازاقستان پرەمەر-مينيسترى ولجاس بەكتەنوۆ ۇكىمەت وتىرىسىندا مينيسترلىك باسشىلارى مەن اكىمدەرگە ءبىرقاتار تاپسىرما بەرىپ، ولاردىڭ جەكە جاۋاپكەرشىلىگىن ەسكەرتتى، ...دەپ حابارلايدى infohub.kz سايتى.
ول ۇلتتىق جوبانىڭ ىسكە اسىرىلۋى پرەزيدەنتتىڭ جەكە باقىلاۋىندا ەكەنىن ەسكە سالدى.
ءبىرىنشى تاپسىرما وڭىرلەردەگى كەلىسىمشارتتاردى ۋاقتىلى جاساسۋ جانە قارجىلاندىرۋ الۋعا قاتىستى. بەكتەنوۆ اكىمدىكتەرگە ەكى اپتا ىشىندە اعىمداعى جىلعى جوبالار بويىنشا شارا قابىلداۋدى، ال ونەركاسىپ جانە قۇرىلىس، ەنەرگەتيكا، ۇلتتىق ەكونوميكا مينيسترلىكتەرىمەن بىرلەسىپ جىل سوڭىنا دەيىن بارلىق جوسپارلانعان جوندەۋ ناۋقاندارىن اياقتاۋدى قامتاماسىز ەتۋدى تاپسىردى. وبلىس اكىمدەرى بۇعان جەكە جاۋاپتى. ونەركاسىپ جانە قۇرىلىس مينيسترلىگىنە ينفراقۇرىلىمدىق جوبالاردىڭ جوبالاۋ-سمەتالىق قۇجاتتاماسىنا مەملەكەتتىك ساراپتامانى جىلدامداتۋ جۇكتەلدى.
ەكىنشى تاپسىرما: مينيسترلىكتەر 1 قىركۇيەككە دەيىن جاڭا وندىرىستەر قۇرۋ جانە قولدانىستاعى وندىرىستەردى كەڭەيتۋ بويىنشا الەۋەتتى وففتەيك-كەلىسىمشارتتار جاساسۋ جۇمىسىن جەدەلدەتۋى قاجەت.
ءۇشىنشى: ەنەرگەتيكا جانە كوممۋنالدىق سەكتورلارداعى سيفرلىق قۇرالدار. ونەركاسىپ جانە ەنەرگەتيكا مينيسترلىكتەرىنە ءبىرىڭعاي سيفرلىق پلاتفورما Smart Turmys ەنگىزۋدى جەدەلدەتۋ تاپسىرىلدى. 1 قىركۇيەككە دەيىن تۇتىنۋشىلار توپتارىنا بولە وتىرىپ، كوممۋنالدىق رەسۋرستاردىڭ ەسەپتەۋ اسپاپتارى مەن باعدارلامالىق قامتاماسىز ەتۋگە ءبىرىڭعاي ستاندارتتار قابىلداۋ كەرەك.
«بايتەرەك» حولدينگىنە 1 قىركۇيەككە دەيىن اعىمداعى جىلدىڭ سوڭىنا دەيىن مالىمدەلگەن بارلىق جوبالاردى دەرەۋ قارجىلاندىرۋدى قامتاماسىز ەتۋ تاپسىرىلدى.
پرەمەر-مينيستر بارلىق وڭىرلىك اكىمدىكتەرگە 1 قىركۇيەككە دەيىن 2027 جىلعى جوبالار بويىنشا ءتيىستى وتىنىمدەردى ۇلتتىق جوبانىڭ ەلەكتروندىق پلاتفورماسىنا (مەكس) جىبەرۋدى جانە ولاردى مۇددەلى تاراپتارمەن كەلىسۋدى قامتاماسىز ەتۋدى تاپسىردى.