بەلگيانىڭ دەندەرموندە قالاسىنداعى ءۇيدى جوندەپ جاتقان قۇرىلىسشىلار قابىرعانىڭ ىشىنەن قۇنى 9 ملن ەۋرو تۇراتىن التىن تاۋىپ الدى. ولار بۇل تۋرالى دەرەۋ پوليسياعا حابارلادى، دەپ مالىمدەيدى infohub.kz.
جۇمىسشىلار ولجانى وزدەرىنە الىپ قالۋدى ويلاماعان. نىسان باسشىسى ماريو VRT ارناسىنا: "مۇندا تيىندار مەن قۇيمالار سونشاما كوپ، ولاردى جاسىرۋ مۇمكىن ەمەس دەرلىك. ونىڭ ۇستىنە، بۇل ۇرلىق بولار ەدى"، — دەدى. قۇرىلىسشى كوبەنىڭ پىكىرىنشە: "9 ملن ەۋرونى جاسىرىپ ۇستاۋ مۇمكىن ەمەس".
ءۇي ءقازىر دەندەرموندەگى الەۋمەتتىك كومەك ۇيىمى CAW Oost-Vlaanderen-گە تيەسىلى. ونىڭ ديرەكتورى گەەرت حيللارت العاشقى رەاكسياسى "تاڭدانىس پەن تاڭعالۋ" بولعانىن ايتىپ، بۇل ولجا ۇيىمنىڭ جۇمىسىنا جانە "كۇن سايىن سەزىنەتىن ۇلكەن قاجەتتىلىكتى" قاناعاتتاندىرۋعا كومەكتەسەدى دەپ ۇمىتتەنەتىنىن جەتكىزدى.
جەرگىلىكتى پوليسيا تۇرعىنداردى قازىنا ىزدەپ، قۇرىلىس الاڭىنا بارماۋعا شاقىردى. پوليسيا بۇل جاڭالىق "دۇرىس ورىنعا" جەتىپ، ادامداردىڭ ءومىرىن وزگەرتەدى دەپ ۇمىتتەنەتىنىن ءبىلدىردى. بەلگيا زاڭى بويىنشا، زاڭدى يەسىنىڭ قازىنانى تالاپ ەتۋگە بەس جىل ۋاقىتى بار، الايدا تەرگەۋ باستاعان جەرگىلىكتى پروكۋرور مۇنىڭ كىم ەكەنى ازىرگە بەلگىسىز ەكەنىن ايتتى.
ەشكىم كەلمەگەن جاعدايدا، ازاماتتىق زاڭناماعا سايكەس، بوتەن م ۇلىكتەن تابىلعان جاسىرىن قازىنا، ەگەر ول قىلمىستىق ارەكەتكە قاتىسى جوق بولسا، تابۋشى مەن م ۇلىك يەسى اراسىندا بولىنەدى. ەندى قۇرىلىسشىلار مەن قايىرىمدىلىق ۇيىمى يەسىنىڭ كەلۋىن 1823 كۇنگە دەيىن كۇتۋى كەرەك. ەگەر ەشكىم ءوز قۇقىعىن دالەلدەي الماسا، ۇنسىزدىك شىنىمەن دە التىنعا اينالادى.