جەرگىلىكتى بيلىكتىڭ مالىمەتىنشە، ءورت سوندىرۋشىلەر بەلگيا تاريحىنداعى ەڭ ءىرى ءورتتى ءسوندىرۋ ءۇشىن ءتۇنى بويى جۇمىس ىستەدى. جەكسەنبى تاڭەرتەڭ ءورت 3 000 گەكتار جەردى شارپىپ، گەرمانيا شەكاراسىنا قاراي بەت العان.
ەلدىڭ شىعىسىنداعى تابيعي قورىق — جوعارعى فەندەگى ءورت جۇما كۇنىنەن بەرى جالعاسىپ كەلەدى. ونى بەلگيانىڭ تۇكپىر-تۇكپىرىنەن جانە كورشىلەس گەرمانيا مەن ليۋكسەمبۋرگتەن كەلگەن ءورت سوندىرۋشىلەر، سونداي-اق اسكەر مەن فەرمەرلەر تەجەۋگە تىرىسۋدا.
بەلگيانىڭ ۆاللونيا ايماعى اكىمشىلىگىنىڭ وكىلى ستەفاني ەرنۋدىڭ Reuters اگەنتتىگىنە ايتۋىنشا، جەكسەنبى كۇنى قۇتقارۋشىلار گەرمانياعا قاراي جىلجىپ بارا جاتقان ءورتتىڭ الدىڭعى شەبىنە نازار اۋدارىپ، سالقىن ءارى ىلعالدى اۋا رايى ءورتتى تەجەۋگە كومەكتەسەدى دەپ ۇمىتتەنۋدە.
ەۋروپالىق ورمان ءورتى تۋرالى اقپارات جۇيەسىنىڭ دەرەكتەرىنە سايكەس، بۇل ءورت 2011 جىلى 1400 گەكتارعا جۋىق جەردى شارپىعان ورتتەن ەكى ەسەدەن استام ۇلكەن.
گەرمانيانىڭ بەلگيا شەكاراسىنا جاقىن ورنالاسقان مونشاۋ قالاسى جەكسەنبى كۇنى ءورتتىڭ گەرمانيا اۋماعىنا تارالمايتىنىن، ءبىراق اۋانىڭ قاتتى لاستانۋى مۇمكىن ەكەنىن حابارلادى. قالا سايتىنداعى مالىمدەمەدە: «سوندىقتان شەكاراعا جاقىن اۋدانداردىڭ تۇرعىندارىنا بۇل اۋماقتاردى تاستاپ كەتۋگە كەڭەس بەرۋ تۋرالى شەشىم قابىلداندى»، — دەلىنگەن.
بەلگيا شۇعىل كۇشەيتۋدى سۇراعاننان كەيىن ەو سەنبى كۇنى ەۋروپانىڭ ءارتۇرلى ايماقتارىنان ءۇش تىكۇشاق پەن ەكى سۋ شاشاتىن ۇشاق جىبەردى.
جەرگىلىكتى بيلىك ەۆاكۋاسيالانعان اۋىلداردى ورتتەن قورعايتىن قورعانىس جەلىسى جەكسەنبى كۇنى ءالى دە ۇستاپ تۇرعانىن، ءبىراق سەنبى كۇنى ەۆاكۋاسيالانعان تۇرعىندارعا ءالى ۇيلەرىنە ورالۋعا بولمايتىنىن ايتتى. لەج گۋبەرناتورىنىڭ كەڭسەسىنىڭ حابارلاۋىنشا، «قازىرگى ۋاقىتتا ۇيلەرگە زاقىم كەلمەگەن، دەگەنمەن ءورت جاقىن جانە ءتۇتىن دەڭگەيى ايتارلىقتاي جوعارى».
بۇل ءورت بەلگيا مەن باسقا دا ەۋروپا ەلدەرى وسى اپتادا جازدىڭ بەسىنشى ىستىق تولقىنىن باستان وتكەرىپ جاتقان كەزدە تۇتاندى. عالىمداردىڭ ايتۋىنشا، ادام ارەكەتىنەن تۋىنداعان كليماتتىڭ وزگەرۋى ءورتتىڭ تەز تارالۋىنا جانە ۇزاق جانۋىنا مۇمكىندىك بەرەتىن ىستىق جانە قۇرعاق اۋا رايىنىڭ ىقتيمالدىعىن ارتتىردى.