قازاقستاندا اۆتوكولىك وتىنىنىڭ قۇنى ەۋرازيالىق ەكونوميكالىق وداق ەلدەرى اراسىندا ەڭ تومەن بولىپ قالۋدا، دەگەنمەن سوڭعى ءبىر جىلدا بەنزين 15،6%-عا قىمباتتادى، دەپ حابارلايدى infohub.kz.
ەۋرازيالىق ەكونوميكالىق كوميسسيانىڭ (ەەك) دەرەكتەرىنە سايكەس، بيىلعى ماۋسىمدا رەسپۋبليكادا بەنزين باعاسى بىلتىرعى سايكەس كەزەڭمەن سالىستىرعاندا ورتا ەسەپپەن 15،6%-عا، ال ديزەل وتىنى 10،6%-عا قىمباتتاعان. ال ەاەو-نىڭ باسقا ەلدەرىندە ءوسىم ودان دا جوعارى بولعان. ماسەلەن، رەسەيدە بەنزين 19،9%-عا، قىرعىزستاندا 17،7%-عا قىمباتتاسا، ديزەل تيىسىنشە 18،1% جانە 26،4%-عا قىمباتتاعان.
ەڭ از ءوسىم بەلارۋستە تىركەلگەن: وندا بەنزين مەن ديزەل ءبىر جىل ىشىندە نەبارى 3،1%-عا قىمباتتاعان. ارمەنيادا بەنزين 18،4%-عا، ديزەل 19%-عا قىمباتتاعان.
قىمباتتاۋعا قاراماستان، قازاقستان ەاەو ەلدەرى اراسىندا وتىننىڭ قولجەتىمدىلىگى بويىنشا كوشباسشىلىعىن ساقتاپ وتىر. ديزەلدىڭ ءبىر ءليترى ورتا ەسەپپەن 336 تەڭگە تۇرادى (ماۋسىمداعى باعام بويىنشا 0،69 دوللار)، ال بەلارۋستە — 468 تەڭگە (0،96 دوللار)، قىرعىزستاندا — 521 تەڭگە (1،07 دوللار)، رەسەيدە — 560 تەڭگە (1،15 دوللار)، ارمەنيادا — 755 تەڭگە (1،55 دوللار).
بەنزيندە دە جاعداي ۇقساس: قازاقستاندا ءبىر ليتر ورتا ەسەپپەن 240 تەڭگە تۇرادى. سالىستىرۋ ءۇشىن، بەلارۋستە باعا 458 تەڭگە (0،94 دوللار)، قىرعىزستاندا — 468 تەڭگە (0،96 دوللار)، رەسەيدە — 477 تەڭگە (0،98 دوللار)، ارمەنيادا — 711 تەڭگە (1،46 دوللار) قۇرايدى.
ەەك سونىمەن قاتار ماۋسىمدا قازاقستاندا بەنزيننىڭ تۇتىنۋ باعاسى وندىرۋشىلەردىڭ ورتاشا باعاسىنان 1،6 ەسە جوعارى بولعانىن اتاپ ءوتتى. بەلارۋستە بۇل كورسەتكىش 1،5 ەسە، رەسەيدە — 2،3 ەسە، ال قىرعىزستاندا — 49،1% قۇرادى.
بۇعان دەيىن قازاقستان الەمدەگى ەڭ ارزان بەنزين بار ەلدەر تىزىمىنە ەنگەن بولاتىن. الايدا ارزان باعانىڭ كەرى جاعى دا بار: كورشى مەملەكەتتەرگە ارزان وتىندى زاڭسىز شىعارۋ جاعدايلارى تىركەلۋدە.