25 شىلدە كۇنى كەشكە بەرلين ورتالىعىندا جوعارى جىلدامدىقپەن كەلە جاتقان فۋرگون Christopher Street Day (CSD) لگبت-شەرۋىنىڭ قاتىسۋشىلارىنا سوقتىعىستى. سالدارىنان ءبىر ادام قازا تاۋىپ، 17 ادام جاراقات الدى، دەپ حابارلايدى infohub.kz.
قايعىلى وقيعا براندەنبۋرگ قاقپاسىنىڭ جانىنداعى تيرگارتەن ساياباعىندا بولدى. پوليسيا مالىمەتىنشە، كولىك ادامداردى قاعىپ، ارتىنشا اعاشقا سوقتىعىسقان. كومەك قىزمەتتەرى وقيعا ورنىنا كەلگەندە، فۋرگون بوس تۇرعان.
سەگىز ادام اۋىر جارالانسا، ۇشەۋىنىڭ جاعدايى اسا اۋىر دەپ باعالانۋدا.
Bild باسىلىمىنىڭ كۋاگەرلەرگە سىلتەمە جاساۋىنشا، كولىكتەن ءبىر ەر ادام جۇگىرىپ شىعىپ، ءىزىن سۋىتقان. پوليسيا اۋقىمدى ىزدەۋ جەدەل-ىزدەستىرۋ شارالارىن باستادى. كۇدىكتىنىڭ جەكە باسى انىقتالدى – ول يسلامشىل توپتارمەن بايلانىسى بار دەلىنەتىن 21 جاستاعى ابدۋل ب. ول ءالى قاشىقتا ءجۇر، ىزدەۋ جالعاسۋدا. وقيعادان كەيىن ماماندار كولىكتى جارىلعىش زاتتارعا تەكسەرگەن، الايدا ونىڭ تابىلعانى تۋرالى حابارلانبادى.
قايعىلى كۇنى بەرليندە ەۋروپاداعى ەڭ ءىرى لگبت-شەرۋلەرىنىڭ ءبىرى – جىل سايىنعى Christopher Street Day ءوتىپ جاتقان بولاتىن. وعان جۇزدەگەن مىڭ ادام قاتىسقان. اپاتتان كەيىن بارلىق مەرەكەلىك ءىس-شارالار دەرەۋ توقتاتىلدى.
تەرگەۋ وقيعانى ادەيى جاسالعان شابۋىل دەپ قاراستىرۋدا. قايعىلى وقيعانىڭ ءمان-جايى انىقتالۋدا.
سوڭعى جىلدارى گەرمانيا مۇنداي شابۋىلدارعا بىرنەشە رەت تاپ بولدى. 2026 جىلعى مامىردا لەيپسيگتە جۇرگىزۋشى جاياۋ جۇرگىنشىلەر ايماعىنا كىرىپ كەتىپ، ەكى ادام قازا تاپتى. 2025 جىلى مانگەيم مەن ميۋنحەندە ۇقساس شابۋىلدار ورىن السا، 2024 جىلعى جەلتوقساندا ماگدەبۋرگتەگى روجدەستۆو جارمەڭكەسىندە بىرنەشە ادام كولىك سوقتىعىسىنان قازا بولدى.