بەرليننىڭ بۋرگوميسترى كاي ۆەگنەر قالانى حاكەرلەر قورقىتىپ وتىرعانىن مالىمدەدى. ولار اي باسىندا قالا جۇيەلەرىنە ەنىپ، دەرەكتەردى ۇرلاعان. ۆەگنەر بيلىك تالاپ ەتىلگەن تولەمدى تولەمەيتىنىن ايتتى. تالاپ بەيسەنبى كۇنى كەشكە قويىلعان. سومانى ول اتامادى، ءبىراق Der Spiegel باسىلىمىنىڭ حابارلاۋىنشا، حاكەرلەر شامامەن 2 ميلليون ەۋرو تۇراتىن 30 بيتكوين تالاپ ەتىپ وتىر.
شابۋىل سالدارىنان قالانىڭ كەيبىر ونلاين جۇيەلەرى ۋاقىتشا توقتاتىلدى. تەرگەۋشىلەر قانداي دەرەكتەردىڭ ۇرلانعانىن انىقتاپ جاتىر. رەسەي مەن شىعىس ەۋروپادان شىققان دەپ ەسەپتەلەتىن جانە بۇعان دەيىن بريتان مۇراجايىنا شابۋىل جاساعان Rhysida توبى بۇل ارەكەتتى ءوز موينىنا العان. Reuters اگەنتتىگىنىڭ مالىمەتىنشە، توپ ءوز سايتىندا بەرليننەن ۇرلانعان 5،79 تەرابايت دەرەكتەردى جەتى كۇن ىشىندە اۋكسيونعا قوياتىنىن مالىمدەگەن.
«بەرلين بوپسالاۋعا جول بەرمەيدى»، — دەدى ۆەگنەر جۇما كۇنى. ول پوليسيا، پروكۋراتۋرا جانە فەدەرالدىق قاۋىپسىزدىك قىزمەتتەرى كۇدىكتىلەردى انىقتاۋ ءۇشىن قارقىندى جۇمىس ىستەپ جاتقانىن، ۇرلانعان دەرەكتەردىڭ مازمۇنى مەن كولەمى تەكسەرىلىپ جاتقانىن ايتتى.
قالا بيلىگى العاشقى دەرەكتەردىڭ 7-12 تامىز ارالىعىندا تاراعانىن حابارلادى. 14 تامىزدا ەكى دەپارتامەنتتىڭ جەلىسى ءوشىرىلىپ، تۇرعىن ءۇي جاردەماقىسىنا ءوتىنىم بەرۋ جانە تولەمدەر بىرنەشە كۇن بويى مۇمكىن بولمادى. كەيىنگى ساراپتاما بەرليننىڭ كولىك جانە قورشاعان ورتا دەپارتامەنتىندە دە دەرەكتەردىڭ تاراعانىن انىقتادى. مەر كەڭسەسى جۇما كۇنى جەكە نەمەسە باسقا دا قۇپيا دەرەكتەردىڭ تاراۋى مۇمكىن ەكەنىن جوققا شىعارمايتىنىن مالىمدەدى.
بيلىك كۇدىكتىلەردى اتاماعانىمەن، Der Spiegel Rhysida توبىنىڭ dark web سايتىنان سكرينشوت جاريالادى. وندا كەلىسىمشارتتار، قۇپيالىلىق كەلىسىمدەرى، كادرلىق قۇجاتتار، پارولدەر جانە مىڭداعان جەكە بايلانىس دەرەكتەرى بار ەكەنى كورسەتىلگەن. سايتتا كەرى ساناق بار، ول اياقتالعان سوڭ دەرەكتەردى 30 بيتكويننان باستاپ اۋكسيونعا شىعاراتىنى ايتىلعان — بۇل بەرليننەن تالاپ ەتىلگەن سومامەن بىردەي.
Rhysida توبى 2023 جىلى پايدا بولعاننان بەرى جۇزدەگەن شابۋىل جاساپ، كوپتەگەن ەلدەردىڭ مەملەكەتتىك مەكەمەلەرى مەن كاسىپورىندارىن نىساناعا العان. 2023 جىلى ول بريتان مۇراجايىنىڭ كومپيۋتەرلىك جۇيەسىنە ەنىپ، قىزمەتتەردى بۇزىپ، شامامەن 500 مىڭ فايلدى ۇرلاعان. مۇراجاي تولەم تولەۋدەن باس تارتقاندا، توپ فايلداردى dark web-تە جاريالاعان. بەرلينگە جاسالعان كيبەرشابۋىل قالادا سايلاۋ وتەتىنگە دەيىن ءبىر اي بۇرىن بولدى. الايدا سەناتور يريس شپرانگەر سايلاۋ ينفراقۇرىلىمىنا ەشقانداي ءقاۋىپ تونبەگەنىن مالىمدەدى.