بەرلين ماڭىنداعى گوزەن-نوي-سيتتاۋ قالاشىعىنداعى مەكتەپتە بولعان قاندى وقيعا سالدارىنان ەكى ادام قازا تاپتى. قازا تاپقانداردىڭ ءبىرى — 18 جاستاعى ورتا مەكتەپ وقۋشىسى، ەكىنشىسى — ارالاسۋعا تىرىسقان 30 جاستاعى ەر ادام، دەپ حابارلايدى جەرگىلىكتى ب ا ق.
كۇدىكتى ەر ادام ۇستالدى. ونىڭ جەكە مەنشىك Docemus مەكتەبىنىڭ وقۋشىسى بولعانى ازىرگە بەلگىسىز. براندەنبۋرگ پوليسياسى الەۋمەتتىك جەلىدەگى پاراقشاسىندا ونى «زورلىق-زومبىلىق ارەكەتىنەن كەيىن» ۇستاعانىن جانە وقيعا ورنىن كۇزەتىپ جاتقانىن مالىمدەدى. Maz Online دەرەكتەرىنە سۇيەنسەك، كۇدىكتى 19 جاستا، ول قازا تاپقان 18 جاستاعى قىزدىڭ بۇرىنعى جىگىتى بولۋى مۇمكىن.
مەكتەپتىڭ باسقارۋشى ديرەكتورى ميحاەل كۋنس جۇما كۇنى ساباقتاردىڭ وتپەيتىنىن ايتتى. «تەرگەۋ جالعاسىپ جاتقاندىقتان، وقيعانىڭ ناقتى ءمان-جايى مەن رەتى تۋرالى ءقازىر ەشقانداي اقپارات بەرە المايمىز جانە بەرمەيمىز»، — دەدى ول جەرگىلىكتى باق-قا.
كۋنس تۇراقتى ساباقتار بولماسا دا، مەكتەپ كەلگىسى كەلەتىن بارلىق وقۋشى ءۇشىن اشىق بولاتىنىن ايتتى. «ءبىز ولارعا ءقاۋىپسىز ورىن جاساعىمىز كەلەدى، وندا ولار جينالىپ، سويلەسىپ، بولعان وقيعانى ساناسىنان وتكىزە الادى»، — دەدى ول. الداعى كۇندەرى مەكتەپ ءومىرىنىڭ قالاي ۇيىمداستىرىلاتىنى تۋرالى «وتە مۇقيات» شەشىم قابىلداناتىنىن قوستى.
وتكەن ايدا گەرمانيانىڭ وڭتۇستىگىندەگى ورتا مەكتەپتە بولعان تاعى ءبىر وقيعادا ەكى قىز اۋىر جارالانىپ، 16 جاستاعى كۇدىكتى ۇستالعان ەدى.