استروفيزيكتەر العاش رەت كۇن جۇيەسىنەن تىس پلانەتادان كەلگەن راديوسيگنالدى تىركەدى. سيگنال كوزى جەردەن 64 جارىق جىلى قاشىقتىقتا ورنالاسقان، دەپ حابارلايدى infohub.kz سايتى.
اشىلىمدى وڭتۇستىك افريكادا ورناتىلعان MeerKAT راديوتەلەسكوپىنىڭ كومەگىمەن امەريكاندىق عالىمدار توبى جاسادى. قابىلدانعان سيگنال — قايتالانىپ كەلەتىن راديوجارىلىستار. ولاردى Beta Pictoris b ەكزوپلانەتاسىمەن بايلانىستىرۋعا مۇمكىندىك تۋدى.
بۇل پلانەتا — جاس گاز گيگانتى، ماسساسى يۋپيتەردەن شامامەن 12 ەسە اۋىر. ول Beta Pictoris جۇلدىزىنىڭ اينالاسىندا اينالادى جانە جەردەن شامامەن 64 جارىق جىلى قاشىقتىقتا. ءبىر جارىق جىلى — شامامەن 9،5 ترلن كيلومەتر، سوندىقتان سيگنال بىزگە بىرنەشە ونداعان جىل بويى جەتىپ كەلگەن.
الايدا بۇل — وزگە وركەنيەتتىڭ حابارلاماسى ەمەس. زەرتتەۋشىلەردىڭ پىكىرىنشە، راديوجارىلىستار پوليارلىق شۇعىلالاردان تۋىنداعان: پلانەتاداعى بولشەكتەر ونىڭ ماگنيت ءورىسىنىڭ سىزىقتارى بويىمەن قوزعالىپ، اتموسفەراداعى گازبەن سوقتىعىسادى. سونىڭ ناتيجەسىندە كۇن جۇيەسىندەگى پلانەتالارداعى پوليارلىق شۇعىلالارمەن ۇقساس راديوتولقىندار پايدا بولادى.
ءدال وسى سيگنال عالىمدارعا ەكزوپلانەتانىڭ ماگنيت ءورىسىن العاش رەت تىكەلەي باعالاۋعا مۇمكىندىك بەردى. ول كەمىندە 1 250 گاۋسس — يۋپيتەردىڭ ماگنيت ورىسىنەن شامامەن 290 ەسە، ال جەردىكىنەن شامامەن 2 500 ەسە كۇشتى.
بۇعان دەيىن Kursiv LifeStyle نەمىس ستارتاپى Isar Aerospace Spectrum زىمىرانىن ءساتتى ۇشىرعانىن حابارلاعان. ۇشىرۋ نورۆەگياداعى ءاننويا عارىش ايلاعىنان جۇزەگە استى. بۇل زىمىراننىڭ ەكىنشى سىناق ۇشۋى ەدى.