قاراڭعى رىساردىڭ جانكۇيەرلەرى سابىر ساقتاۋعا ءماجبۇر: Warner Bros. كومپانياسى روبەرت پاتتينسون قاتىساتىن «بەتمەن 2» ءفيلمىنىڭ پرەمەراسىن تاعى دا كەيىنگە شەگەردى. الايدا رەجيسسەر مەتت ريۆز جالعاستىڭ ءتۇسىرىلىم الاڭىنان العاشقى كادرلارىن كورسەتتى... دەپ حابارلايدى infohub.kz سايتى.
ەندى ەكىنشى ءبولىم 2028 جىلدىڭ 18 اقپانىندا الەمدىك پروكاتقا شىعادى. باستاپقىدا ءفيلمدى 2026 جىلدىڭ قازانىندا شىعارۋ جوسپارلانعان ەدى، كەيىن 2027 جىلدىڭ قازانىنا شەگەرىلدى، ال ءقازىر تاعى دا بەس ايعا جۋىق كەيىنگە قالدىرىلدى.
جاڭا كۇننىڭ جاريالانۋىمەن بىرگە رەجيسسەر تۇسىرىلىمنەن العاشقى سىناق بەينەجازباسىن جاريالادى، وندا روبەرت پاتتينسون قايتادان بەتمەن بەينەسىندە كورىنەدى.
سيۋجەتتىڭ ەگجەي-تەگجەيى ازىرشە قۇپيا. اكتەرلىك قۇرامعا سكارلەتت يوحانسسون، سەباستيان ستەن، چارلز دەنس، برايان تايري گەنري جانە سەباستيان كوح قوسىلعانى بەلگىلى.
بۇعان دەيىن پاتتينسون جالعاستىڭ سەناريىن ەرەكشە تۇردە العانى حابارلانعان بولاتىن: قۇجات اقپاراتتىڭ سىرتقا شىعۋىن بولدىرماۋ ءۇشىن كودتىق ق ۇلىپپەن جابدىقتالعان ارنايى سەيف-پاكەتكە سالىنعان ەكەن. بۇل تۋرالى مەتت ريۆز 2025 جىلعى «ەممي» سىيلىعىنىڭ قىزىل كىلەمىندە ايتتى. اكتەر نيۋ-يوركتە بولعان جانە ءماتىندى قاتاڭ حاتتاما اياسىندا عانا وقي الدى.