ماڭعىستاۋ وبلىسىندا قازاقستان بويىنشا العاش رەت قىستا جولدى دۇرىس ۇستاماعانى ءۇشىن سوت ۇكىمى شىقتى. جولاۋشىلار اۆتوبۋسىنىڭ قاتىسۋىمەن بولعان اپاتتا بەس ادام قازا تاپتى، دەپ حابارلايدى infohub.kz.
بەينەۋ اۋداندىق سوتى 2026 جىلعى 16 قاڭتاردا رەسپۋبليكالىق ماڭىزى بار دوسسور – قۇلسارى – بەينەۋ – ساي-وتەس – شەتپە – جەتىباي – اقتاۋ تاس جولىندا بولعان ولىمگە اكەلگەن جول-كولىك وقيعاسى بويىنشا قىلمىستىق ءىستى قارادى.
سول كۇنى Yutong ماركالى جولاۋشىلار اۆتوبۋسى مۇزدىڭ سالدارىنان جولدان شىعىپ كەتىپ، اۋدارىلعان. اپات سالدارىنان بەس ادام قازا تاۋىپ، تاعى 14 ادام ءارتۇرلى جاراقات الدى.
باس كولىك پروكۋراتۋراسىنىڭ حابارلاۋىنشا، تراگەديا قىستا جولدى ءتيىستى دەڭگەيدە ۇستاماعاندىقتان بولعان. تەرگەۋ جاۋاپتى تۇلعالاردىڭ ارەكەتسىزدىگى مەن ادامداردىڭ قازاسى اراسىندا تىكەلەي سەبەپ-سالدارلىق بايلانىس بار دەگەن قورىتىندىعا كەلدى.
پروكۋراتۋرا مالىمدەگەندەي، بۇل – قازاقستاننىڭ قۇقىق قولدانۋ تاجىريبەسىندەگى العاشقى قىلمىستىق ءىس، وندا قىستا اۆتوموبيل جولىن ءتيىستى دەڭگەيدە ۇستاماۋ ادامداردىڭ ولىمىنە بايلانىستى قىلمىستىق جاۋاپكەرشىلىككە تارتۋعا نەگىز بولدى.
سوت «قاجسەرۆيس» ج ش س ماڭعىستاۋ وبلىستىق فيليالىنىڭ جەۋ-57 باستىعىن ق ر قك 353-بابى 4-بولىگى بويىنشا كىنالى دەپ تانىپ، وعان ەكى جىل التى اي باس بوستاندىعىنان ايىرۋ جازاسىن شارتتى تۇردە تاعايىندادى.
ۇكىم ءالى زاڭدى كۇشىنە ەنگەن جوق.
بۇعان دەيىن ءبىز قازاقستاندىقتاردىڭ ءۇش كۇن ىشىندە بۇكىل ەل بويىنشا 22 مىڭنان استام رەت ەرەجە بۇزعانى تۋرالى جازعان بولاتىنبىز.