BI Group حولدينگىنىڭ ەنشىلەس قۇرىلىمى — BI Development قۇرىلىس كومپانياسى قازاقستاندىقتارعا جىلدىق مولشەرلەمەسى 7،75%-عا دەيىنگى دوللارلىق وبليگاسيالارعا ينۆەستيسيا سالۋدى ۇسىندى، دەپ حابارلايدى infohub.kz سايتى.
قازاقستان قور بيرجاسىندا (KASE) كومپانيا جالپى كولەمى $9 ملن بولاتىن ەكى جانە ءۇش جىلدىق دوللارلىق وبليگاسيالاردىڭ ەكى شىعارىلىمىن ورنالاستىرادى. باعالى قاعازدار $15 ملن كولەمىندەگى ليستينگتىك شىعارىلىمدار ساناتىنا ەنەدى. ءبىر قاعازدىڭ نومينالدىق قۇنى نەبارى $100 بولادى.
ءبىرىنشى شىعارىلىم — 2028 جىلدىڭ 29 قىركۇيەگىنە دەيىن، جىلدىق مولشەرلەمەسى 7،5%، سوماسى $7 ملن. ول بويىنشا سىياقى جىلىنا ەكى رەت تولەنەدى، ال ءبىر قاعازدىڭ نومينالى $100 قۇرايدى.
ەكىنشى شىعارىلىم — 2029 جىلعا دەيىن. ءۇش جىلدىق وبليگاسيالار بويىنشا مولشەرلەمە 7،75% دەپ باعالانىپ وتىر، كولەمى — $2 ملن. ءبىر قاعازدىڭ قۇنى دا $100 بولادى.
تۇپكىلىكتى كۋپون، ياعني وبليگاسيالار بويىنشا سىياقى ينۆەستورلاردىڭ وتىنىمدەرى بويىنشا ساۋدا-ساتتىق بارىسىندا ايقىندالادى. ورنالاستىرۋ 29 قىركۇيەكتە وتەدى، وبليگاسيالاردى بروكەر ارقىلى ساتىپ الۋعا بولادى.
سالىستىرۋ ءۇشىن: جەكە تۇلعالارعا ارنالعان ۆاليۋتالىق دەپوزيتتەر بويىنشا ەڭ جوعارى مولشەرلەمە 1% قۇرايدى. 1 قازاننان باستاپ كەيبىر سالىم تۇرلەرى بويىنشا ول جىلدىق 2،5%-عا دەيىن وسەدى.
قازاقستانداعى دوللارلىق وبليگاسيالار بويىنشا نارىقتىق مولشەرلەمەلەر ەميتەنتتىڭ سەنىمدىلىگى مەن الاڭىنا قاراي جىلدىق 6%-دان 11%-عا دەيىن. الايدا ورنالاستىرۋ كەزىندەگى قاعازدىڭ ەڭ تومەنگى قۇنى، ادەتتە، $100-دەن جوعارى، جانە مۇنداي وبليگاسيالار تەك كاسىبي ينۆەستورلارعا قولجەتىمدى.
تۇرعىن جانە كوممەرسيالىق جىلجىمايتىن م ۇلىكتىڭ ءىرى قۇرىلىس كومپانياسى BI Development BI Group حولدينگىنىڭ قۇرامىنا كىرەدى. ونىڭ ماجوريتارلىق اكسيونەرى — بيزنەسمەن ايدىن راحيمبايەۆ، ونىڭ بايلىعىن Forbes $1،1 ملرد دەپ باعالايدى. باسىلىم ونى قازاقستاندىق ەڭ باي بيزنەسمەندەر تىزىمىندە توعىزىنشى ورىنعا قويادى.
بۇعان دەيىن Freedom Finance كومپانياسى AIX بيرجاسىندا مولشەرلەمەسى 8،5% بولاتىن ءۇش جىلدىق دوللارلىق وبليگاسيالاردى ورنالاستىرعان.