قازاقستاننىڭ ءىرى قۇرىلىس كومپانياسى BI Development ءبىرىنشى جارتىجىلدىقتا 56 ملرد تەڭگە تازا پايدا تاپتى، بۇل وتكەن جىلمەن سالىستىرعاندا 14%-عا ارتىق. كومپانيانىڭ نەگىزگى تابىسى تۇرعىن ءۇي ساتۋدان ءتۇستى، دەپ حابارلايدى infohub.kz.
AIX-تە جاريالانعان كومپانيا ەسەپتىلىگىنە ەكونوميست ارمان باتايەۆ نازار اۋداردى. قۇرىلىس كومپانياسىنىڭ ءبىرىنشى جارتىجىلدىقتاعى تازا پايداسى 56 ملرد تەڭگەنى قۇرادى (جىلدىق كورسەتكىشپەن 14%-عا ءوسىم). سونىمەن قاتار كىرىس 7،3%-عا ءوسىپ، 341 ملرد تەڭگەگە جەتتى. نىسانداردىڭ وزىندىك قۇنى 7،8 ملرد تەڭگەگە ارتىپ، 238،5 ملرد تەڭگەنى قۇرادى.
ساتۋ شىعىندارى 9%-عا ءوسىپ، 10،4 ملرد تەڭگە بولدى. اكىمشىلىك شىعىندار ايتارلىقتاي ءوستى – 5،5 ملرد تەڭگەگە، 35،6 ملرد تەڭگەگە دەيىن. باسقا وپەراسيالىق كىرىستەردىڭ دە ءوسۋى بايقالدى – 6،3 ملرد تەڭگەگە، ال شىعىندار 8،7 ملرد تەڭگەگە جەتتى.
كومپانيانىڭ جالپى كىرىسىنىڭ 309 ملرد تەڭگەسى تۇرعىن ءۇي ساتۋدان ءتۇستى (9،3%-عا ءوسىم)، كوممەرسيالىق نىساندار بويىنشا كىرىس 29 ملرد تەڭگەنى قۇرادى (13،7%-عا تومەندەۋ). كىرىستىڭ 79%-ى قازاقستاندا الىنعان.
سونىمەن قاتار BI Development اكتيۆتەرى 19،2%-عا ءوسىپ، 2،35 ترلن تەڭگەگە جەتتى. كومپانيانىڭ سالىنىپ جاتقان نىساندارى 957 ملرد تەڭگەگە باعالانۋدا (50%-عا ءوسىم)، جەر تەلىمدەرى – 405،1 ملرد تەڭگە (4%-عا تومەندەۋ). قۇرىلتايشىسى ايدىن راحيمبايەۆ ايتقان قيىندىقتارعا قاراماستان، كومپانيا قۇرىلىس كولەمىن ۇلعايتۋدى جالعاستىرۋدا.
ەكونوميست باتايەۆ BI Development-تە ساتىپ الۋشىلاردان تۇسكەن اۆانستاردىڭ ۇلكەن كولەمى بار ەكەنىن اتاپ ءوتتى. كەلىسىمشارتتىق مىندەتتەمەلەر 1،28 ترلن تەڭگەدەن 1،55 ترلن تەڭگەگە دەيىن، ياعني 21،5%-عا ءوستى. بۇل – ساتىپ الۋشىلاردىڭ جىلجىمايتىن م ۇلىككە الدىن الا تولەمدەرى، ولار نىساندار تاپسىرىلعان سايىن كىرىسكە اينالادى.
BI Development بالانسىندا جەكە قورعا 97،6 ملرد تەڭگە ينۆەستيسيا بار، وتكەن جىلدىڭ سوڭىندا بۇل كورسەتكىش 78،6 ملرد تەڭگە ەدى. بۇل قور اكسيونەرلەردىڭ حالىقارالىق بيزنەسىنە ينۆەستيسيا سالادى، ينۆەستيسيالاردىڭ باسىم بولىگى ءباا مەن اقش-تا شوعىرلانعان.
ەسەپتە BI Development BI Group قۇرامىنا كىرەتىنى كورسەتىلگەن. سوڭعىسىنىڭ تۇپكىلىكتى باقىلاۋشى تۇلعاسى – ايدىن راحيمبايەۆ، ول $1،1 ملرد بايلىعىمەن قازاقستاندىق ەڭ باي ازاماتتار اراسىندا توعىزىنشى ورىندا تۇر.
بۇعان دەيىن ايدىن راحيمبايەۆ قازاقستانداعى تۇرعىن ءۇي نارىعى ءبىر جارىم جىلدان ەرتە قالپىنا كەلە باستاۋى مۇمكىن ەكەنىن ايتقان. ول قۇرىلىس كومپانيالارى سۇرانىستىڭ تومەندەۋى جاعدايىندا جۇمىس ىستەپ جاتقانىن جانە نارىقتىڭ جىلدام وزگەرۋىنە العىشارتتاردى ازىرگە كورمەيتىنىن اتاپ ءوتتى.